ការតាំងពិព័រណ៍ពាណិជ្ជកម្មដ៏ធំមួយកំពុងដំណើរការនៅក្នុងប្រទេសអាហ្វហ្គានីស្ថាន បានបង្ហាញពីទំនាក់ទំនងសេដ្ឋកិច្ចកាន់តែស៊ីជម្រៅរបស់ប្រទេសនេះជាមួយប្រទេសជិតខាងខ្លួន ក្នុងពេលមានការដាក់ទណ្ឌកម្មយ៉ាងតឹងរ៉ឹងពីសំណាក់ប្រទេសលោកខាងលិច។

ក្រុមហ៊ុនតាំងពិព័រណ៍ក្នុងស្រុក និងបរទេសប្រហែល៧០០ កំពុងចូលរួមក្នុងព្រឹត្តិការណ៍រយៈពេលប្រាំពីរថ្ងៃ ដែលបានបើកនៅក្នុងរដ្ឋធានីកាប៊ុល។

មុខទំនិញពិសេសៗរួមមានអាហារ និងកំរាលព្រំ ដែលផលិតនៅក្នុងប្រទេស។

ក្រុមហ៊ុនដឹកជញ្ជូនរបស់ប្រទេសអាហ្វហ្គានីស្ថាន ដែលដឹកជញ្ជូនទំនិញពីប្រទេសចិន បានប្រាប់អ្នកមកទស្សនាអំពីគម្រោងដែលបានអនុវត្តក្នុងកិច្ចសហការជាមួយដៃគូប្រទេសចិន។

ក្រុមហ៊ុនដែលកំពុងចូលរួមក្នុងព័រណ៍នេះ បានណែនាំផលិតផល និងសេវាកម្ម ដូចជាឧបករណ៍ប្រើប្រាស់ក្នុងលំនៅឋាន និងបច្ចេកវិទ្យាខួងយករ៉ែ។

ក្រុមហ៊ុនមួយចំនួន បានធ្វើការចរចាជាមួយក្រុមហ៊ុនរបស់ប្រទេសអាហ្វហ្គានីស្ថាន។

អ្នកជំនួញអាហ្វហ្គានីស្ថានម្នាក់និយាយថា ស្ថានភាពសេដ្ឋកិច្ចមិនល្អ ប៉ុន្តែមនុស្សជាច្រើនបានមកចូលរួមក្នុងពិព័រណ៌ និងរៀបចំកិច្ចពិភាក្សាពាណិជ្ជកម្ម ដូច្នេះស្ថានភាពកាន់តែល្អប្រសើរឡើង។

ប្រទេសលោកខាងលិច កំពុងរក្សាការដាក់ទណ្ឌកម្មដ៏តឹងរ៉ឹងលើប្រទេសអាហ្វហ្គានីស្ថាន ដោយលើកហេតុផលថា ក្រុមតាលីបង់ រឹតត្បិតលើសិទ្ធិស្ត្រី។