អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃអង្គារថា ប្រទេសលីបង់កំពុងស្ថិតក្នុងដំណាក់កាលនៃសង្គ្រាមពេញបន្ទុក ប៉ុន្តែនៅតែមានពេលបញ្ឈប់បាន។

ថ្លែងទៅកាន់ក្រុមអ្នកសារព័ត៌មាននៅទីស្នាក់ការអង្គការសហប្រជាជាតិនៅទីក្រុងញូវយ៉ក លោក Guterres បាននិយាយថា មជ្ឈិមបូព៌ា គឺជាឆ្នួនគ្រឿងផ្ទុះដែលតម្រូវឲ្យភាគីជាច្រើនរួមគ្នាដោះស្រាយ។

ប្រមុខអង្គការសហប្រជាជាតិបាននិយាយថា ខ្ញុំបានព្រមានអស់រយៈពេលជាច្រើនខែអំពីហានិភ័យនៃការរីករាលដាលជម្លោះ ដោយបន្ថែមថាស្ថានភាពនៅក្នុងតំបន់ West Bank កំពុងពុះកញ្ជ្រោលខ្លាំងណាស់ ហើយការវាយប្រហារនៅក្នុងប្រទេសលីបង់ កំពុងគំរាមកំហែងដល់តំបន់ទាំងមូល។

លោកបាននិយាយថា ក្នុងរយៈពេលប៉ុន្មានថ្ងៃចុងក្រោយនេះ ការបាញ់ប្រហារគ្នារវាងក្រុមហេសបូឡា និងក្រុមផ្សេងទៀតនៅក្នុងប្រទេសលីបង់ និងកងកម្លាំងការពារអ៊ីស្រាអែល កាន់តែក្ដៅគគុក នៅទូទាំងបន្ទាត់ខៀវ (Blue Line) ដោយពុំទទួលបានការយកចិត្តទុកដាក់ទាំងស្រុងលើសេចក្ដីសម្រេចរបស់ក្រុមប្រឹក្សាសន្តិសុខ លេខ ១៧០១ និង ១៥៥៩ សោះឡើយ។

ប្រមុខអង្គការសហប្រជាជាតិរូបនេះ បានកត់សម្គាល់ថា ការវាយប្រហារទ្រង់ទ្រាយធំរបស់អ៊ីស្រាអែលចូលជ្រៅទៅក្នុងប្រទេសលីបង់ រួមទាំងរដ្ឋធានីបេរូត បានសម្លាប់មនុស្សជាង២.០០០នាក់ ហើយ១.៥០០នាក់ក្នុងរយៈពេលត្រឹមតែពីរសប្តាហ៍ចុងក្រោយនេះប៉ុណ្ណោះ ។ការវាយប្រហារដោយក្រុមហេសបូឡា និងក្រុមផ្សេងទៀតនៅភាគខាងត្បូងនៃបន្ទាត់ខៀវបានសម្លាប់មនុស្ស៤៩ នាក់ចុងក្រោយនេះ។ លើសពីនេះ ក្រុមអាជ្ញាធរលីបង់រាយការណ៍ថា មនុស្សជាង ១លាននាក់ត្រូវបានភៀសខ្លួននៅក្នុងប្រទេសលីបង់ ហើយមនុស្ស ៣០០,០០០នាក់បានភៀសខ្លួនចូលទៅក្នុងប្រទេសស៊ីរី ខណៈមនុស្សជាង ៦០,០០០នាក់នៅតែភៀសខ្លួនពីភាគខាងជើងអ៊ីស្រាអែល៕