រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គ្រោងផ្តល់ទិន្នន័យ​លើ​ការ​វិនិយោគ​វិស័យ​អចលន​ទ្រព្យ និងសំណង់ នៅរាជ ធានីភ្នំពេញ ទៅដល់បណ្តាក្រុមហ៊ុនទាំងអស់ អំពីតម្រូវ​ការ​អភិវឌ្ឍន៍​ផ្ទះស​ម្បែង អគាការិយាល័យផ្សេងៗ សម្រាប់ជាផែនការ ដើម្បីជំរុញ ឱ្យវិនិយោគលើ​វិស័យ​នេះ​ឆ្លើយតបតាមតម្រូវរស់នៅរបស់ប្រជាជន។

ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និង​សំណង់ លើកឡើងក្នុងពិធីសម្ពោធ ជាផ្លូវការ របស់ប៊ូយ៉ុងថោន នៅថ្ងៃទី៨ ខែតុលា ម្សិលមិញ​នេះ​ថា ជុំវិញការអភិវឌ្ឍន៍វិស័យសំណង់នៅរាជធានីភ្នំពេញនេះ ក្រសួងបាននិង កំពុងគិតគូរ និង​មាន​ផែន​ការ​មួយចំនួន ដោយបច្ចុប្បន្នក្រសួងបានមើលទាំងការរស់នៅរបស់ប្រជាជន, ប្រភេទការងារ និងការទទួលបាន ប្រាក់ចំណូលជាដើម ដើម្បីជំរុញការអភិវឌ្ឍន៍លំនៅឋាន នៃការអភិវឌ្ឍន៍​អចនទ្រព្យ​ឱ្យ​ឆ្លើយតបការរស់នៅជាក់ស្តែង របស់ប្រជាជនដែល កំពុងរស់នៅរាជធានីភ្នំពេញ។

ឯកឧត្តម បន្តថា ទាក់ទិនការអភិវឌ្ឍន៍នេះ, ក្រសួងនឹងផ្តល់ទិន្នន័យជូនដល់គ្រប់បណ្តាក្រុមហ៊ុនអភិវឌ្ឍន៍វិស័យសំណង់ទាំងអស់ ដើម្បីជំរុញអភិវឌ្ឍន៍វិស័យអចលនទ្រព្យ និងសំណង់នៅរាជធានីភ្នំពេញ ជាពិសេសលើតម្រូវការអភិវឌ្ឍន៍ផ្ទះសម្បែង មានបុរី ផ្ទះល្វែង និងខុនដូរ និងអគាការិយាល័យផ្សេងៗជាដើម សម្រាប់ជាផែនការចង្អុលផ្លូវ ដើម្បីជំរុញឱ្យអ្នកវិនិយោគលើវិស័យនេះ ឱ្យឆ្លើយតបតាម តម្រូវជាក់ស្តែង ខណៈនាពេលកន្លងមក ការអភិវឌ្ឍន៍លើវិស័យសំណង់មានច្រើនលើសតម្រូវការ ដែលធ្វើឱ្យអ្នកវិនិយោគជួបប្រឈម បញ្ហាផ្សេងៗ។

ឯកឧត្តម ឧបនាយករដ្ឋមន្រ្តី បន្តថា ក្រៅពីគោលការណ៍ខាងលើនេះ, នៅក្នុងពេលឆាប់ៗខាងមុខ ក្រសួងក៏មានផែនការនឹងផ្តល់ ជូនអំពីប្រភេទការងារ ចំនួនការងារ និងប្រាក់ខែក្នុងវិស័យការងារជាដើម ដើម្បីឱ្យវិស័យឯកជនដែលជាអ្នកអភិវឌ្ឍន៍វិស័យអចលនទ្រព្យ និងសំណង់ ជំរុញគម្រោងអភិវឌ្ឍន៍របស់ខ្លួនឱ្យត្រូវតាមផែនការ និងតម្រូវការរស់របស់ប្រជាជនដែលអាចទិញលំនៅឋាន ឬក៏បង់រំលស់ បាន។

 ឯកឧត្តម សាយ សំអាល់ បានបញ្ជាក់បន្ថែមថា ជុំវិញគម្រោងអភិវឌ្ឍន៍វិស័យសំណង់នេះ ក្រសួងនឹងជួយជ្រោមជ្រែង ដើម្បីរក្សាឧស្សាហ កម្មសំណង់, ឧស្សាហកម្មអចលនទ្រព្យ, ឧស្សាហកម្មគ្រឿងបង្គុំសំណង់, ឧស្សាហកម្មសង្ហារឹម, និងឧស្សាហកម្មគ្រឿងលម្អផ្ទះ ពីព្រោះ ប្រភេទឧស្សាហកម្មទាំងអស់នេះ បង្កើតរាប់ម៉ឺនការងារជូនដល់ប្រជាជនកម្ពុជា មានប្រាក់ខែសមរម្យ ហើយ វិស័យនេះក៏ធ្វើឱ្យប្រជាជន កម្ពុជាមានជីវភាពរីកចម្រើន ហើយក៏ជាសន្តិសុខសេដ្ឋកិច្ចរបស់កម្ពុជា និងសន្តិសុខនយោបាយរបស់ប្រទេសជាតិផងដែរ៕ អត្ថបទ៖ សុន រ៉ាឌី