ប្រមុខទីភ្នាក់ងារស៊ើបការណ៍សម្ងាត់ក្នុងស្រុករបស់អង់គ្លេស កាលពីថ្ងៃអង្គារ (ទី៨ ខែតុលា) បាននិយាយថា ប្រទេសអង់គ្លេសកំពុងប្រឈមនឹង «ការកើនឡើងដ៏មិនគួរឲ្យជឿ» នូវគម្រោងការប៉ុនប៉ងធ្វើឃាត អំពើវិឆ្ឆេទកម្ម និងឧក្រិដ្ឋកម្មផ្សេងទៀត នៅលើទឹកដីចក្រភពអង់គ្លេស ដែលបង្កឡើងដោយរុស្ស៊ី និងអ៊ីរ៉ង់ ខណៈដែលរដ្ឋទាំង២ នេះ ជ្រើសរើសពួកឧក្រិដ្ឋជន ដើម្បីឲ្យ «បំពេញការងារអាក្រក់ៗរបស់ពួកគេ»។

អគ្គនាយករបស់ទីភ្នាក់ងារ MI5 លោក Ken McCallum បាននិយាយថា ភ្នាក់ងារ និងនគរបាលរបស់លោក បានដោះស្រាយគម្រោងការ «បង្កមហន្តរាយ» ចំនួន ២០ដង ដែលគាំទ្រដោយអ៊ីរ៉ង់ គិតចាប់តាំងពីឆ្នាំ២០២២ ហើយបានព្រមានថា ប្រទេសនេះអាចពង្រីកគោលដៅរបស់ខ្លួន នៅក្នុងចក្រភពអង់គ្លេស ប្រសិនបើជម្លោះ នៅតំបន់មជ្ឈិមបូព៌ា កាន់តែមានសភាពធ្ងន់ធ្ងរឡើងៗ។

រហូតមកដល់ពេលនេះ ការគំរាមកំហែង គឺសំដៅទៅលើជនជាតិអ៊ីរ៉ង់នៅបរទេស ដែលប្រឆាំងនឹងអាជ្ញាធររបស់ប្រទេស។ ប៉ុន្តែលោក McCallum បាននិយាយថា មានហានិភ័យពីការកើនឡើង ឬការពង្រីកបន្ថែម នូវការបង្កអរិភាពរបស់រដ្ឋអ៊ីរ៉ង់ នៅចក្រភពអង់គ្លេស។ ប្រសិនបើវិបត្តិ នៅមជ្ឈិមបូព៌ា កាន់តែមានភាពតានតឹង ដោយអ៊ីស្រាអែលបើកការវាយប្រហារដ៏ធំមួយ ដើម្បីឆ្លើយតបទៅនឹងការបោចស្រោចមីស៊ីលរបស់អ៊ីរ៉ង់ នាពេលថ្មីៗនេះ។

នៅឯមជ្ឈមណ្ឌលបញ្ជាការប្រឆាំងភេរវកម្មរបស់ចក្រភពអង់គ្លេស នៅទីក្រុងឡុងដ្រ៍ លោក McCallum បានប្រាប់អ្នកសារព័ត៌មានថា ចំនួននៃការស៊ើបអង្កេតការគំរាមកំហែងដោយរដ្ឋ ដែលធ្វើឡើងដោយទីភ្នាក់ងារ MI5 បានកើនឡើង ៤៨ភាគរយ នៅក្នុងឆ្នាំមុន ដោយប្រទេសអ៊ីរ៉ង់ រុស្ស៊ី និងចិន គឺជាជនល្មើសចម្បង៕