ក្រុមប្រឹក្សាជាតិរៀបចំការបោះឆ្នោត (CNE) របស់ប្រទេសកូឡុំប៊ី កាលពីថ្ងៃអង្គារ (ទី៨ ខែតុលា) បានស្នើសុំឲ្យមានការស៊ើបអង្កេតលើយុទ្ធនាការបោះឆ្នោតឆ្នាំ២០២២ របស់ប្រធានាធិបតី លោក Gustavo Petro ជុំវិញការចោទប្រកាន់ដែលថា បានរំលោភលើដែនកំណត់ហិរញ្ញវត្ថុ។ នេះបើតាមសេចក្ដីថ្លែងការណ៍របស់ស្ថាប័ននេះ។

ភាគច្រើននៃចៅក្រមថ្នាក់ក្រោម ៩រូប បានបោះឆ្នោតអនុម័តឲ្យមានការស៊ើបអង្កេតលើលោក Petro និងអ្នកគ្រប់គ្រងយុទ្ធនាការរបស់លោក គឺលោក Ricardo Roa ដែលបច្ចុប្បន្នជានាយកប្រតិបត្តិនៃក្រុមហ៊ុនថាមពលគ្រប់គ្រងដោយរដ្ឋភាគច្រើនរបស់ប្រទេសកូឡុំប៊ី គឺក្រុមហ៊ុន Ecopetrol។

ការសម្រេចឲ្យមានការស៊ើបអង្កេតនេះកើតឡើងប៉ុន្មានសប្តាហ៍ បន្ទាប់ពីលោក Petro ដែលជាប្រធានាធិបតីខាងក្រុមឆ្វេងនិយមដំបូងរបស់ប្រទេសកូឡុំប៊ី បានព្រមានអំពីផែនការដែលត្រូវបានលើកឡើងដោយគ្មានភស្តុតាងថា មានគោលបំណងធ្វើឃាតរូបលោក ឬទម្លាក់លោកចេញពីអំណាច តាមរយៈតុលាការ។

នៅលើវេទិកាបណ្ដាញសង្គម X បន្ទាប់ពី CNE បានចេញផ្សាយសេចក្តីថ្លែងការណ៍របស់ខ្លួន លោក Petro បានសរសេរថា៖ «រដ្ឋប្រហារបានចាប់ផ្តើមហើយ»។

ប្រសិនបើការស៊ើបអង្កេតបន្តទៅមុខ ករណីរបស់លោក Petro នឹងត្រូវបានពិចារណាដោយគណៈកម្មាធិការចោទប្រកាន់របស់សភាជាន់ទាប ដែលប្រធានាធិបតីត្រូវតែទទួលការជំនុំជម្រះតាមរដ្ឋធម្មនុញ្ញ៕