ទូរទស្សន៍ Al Arabiya បានរាយការណ៍ដោយដកស្រង់ប្រភពការទូតបារាំងថា ជាបុរេលក្ខខណ្ឌសម្រាប់បទឈប់បាញ់ នៅភាគខាងត្បូងប្រទេសលីបង់ អ៊ីស្រាអែលទាមទារឲ្យកងជីវពលហេសបូឡានៅប្រទេសលីបង់ ទម្លាក់អាវុធចុះ និងដកកងកម្លាំងរបស់ខ្លួន។

ប្រភពមួយ បាននិយាយថា៖ «អ៊ីស្រាអែលទាមទារឲ្យក្រុមហេសបូឡា ទម្លាក់អាវុធរបស់ខ្លួន ហើយដកកងកម្លាំងថយ ទៅភាគខាងជើងចេញពីទន្លេ Litani ជាថ្នូរនឹងបទឈប់បាញ់ នៅប្រទេសលីបង់»។

កាលពីថ្ងៃទី ២៣ ខែកញ្ញា អ៊ីស្រាអែល បានចាប់ផ្តើមប្រតិបត្តិការយោធាមួយដែលមានឈ្មោះថា Northern Arrows ប្រឆាំងនឹងក្រុមហេសបូឡា ក្នុងប្រទេសលីបង់ ដោយបានធ្វើការវាយប្រហារយ៉ាងទូលំទូលាយ នៅទីតាំងយោធារបស់ក្រុមនេះ។ ក្នុងការវាយប្រហារកាលពីថ្ងៃទី២៧ ខែកញ្ញា អ៊ីស្រាអែល បានសម្លាប់អគ្គលេខាធិការក្រុមហេសបូឡា លោក ហាសសាន ណាស្រាឡា (Hassan Nasrallah) នៅទីក្រុងបេរូត។ នៅពេលយប់ឈានចូលថ្ងៃទី ០១ ខែតុលា អ៊ីស្រាអែល បានប្រកាសពីការចាប់ផ្តើមប្រតិបត្តិការជើងគោក នៅតំបន់ព្រំដែននៃភាគខាងត្បូងប្រទេសលីបង់។