ស្ថានទូតអ៊ីរ៉ង់ប្រចាំប្រទេសស៊ីរី បានថ្កោលទោសការវាយប្រហាររបស់អ៊ីស្រាអែល ទៅលើអគារជនស៊ីវិលក្នុងទីក្រុងដាម៉ាស ( Damascus) ប៉ុន្តែបាននិយាយថា មិនមានពលរដ្ឋអ៊ីរ៉ង់ណាម្នាក់ ក្នុងចំណោមជនរងគ្រោះនោះទេ។

ស្ថានទូត បាននិយាយនៅលើបណ្តាញសង្គម X ថា៖«សត្រូវរបស់អ៊ីស្រាអែល បានប្រព្រឹត្តឧក្រិដ្ឋកម្មមួយទៀត ជាការកំសាកណាស់ដែលបាញ់មីស៊ីលនៅអគារជនស៊ីវិល នៅកណ្តាលទីក្រុងដាម៉ាស និងបានសម្លាប់ស្ត្រី និងកុមារស្លូតត្រង់»។

ក្រុមអ្នកការទូតអ៊ីរ៉ង់ បានបន្ថែមថា៖«ស្ថានទូតថ្កោលទោសអំពើភេរវកម្មនេះ ហើយជូនដំណឹងថា គ្មានពលរដ្ឋអ៊ីរ៉ង់ណាម្នាក់ ក្នុងចំណោមជនរងគ្រោះទេ»។

មុននេះ ក្រសួងការពារជាតិស៊ីរី បាននិយាយថា អ៊ីស្រាអែល បានធ្វើការវាយប្រហារដោយមីស៊ីលពីតំបន់ខ្ពង់រាប Golan Heights ដែលគ្រប់គ្រងដោយអ៊ីស្រាអែល ដោយកំណត់គោលដៅទៅលើអគារលំនៅឋាន និងពាណិជ្ជកម្មមួយ នៅក្នុងសង្កាត់ Mezzeh ដែលមានប្រជាជនរស់នៅច្រើន នៅក្នុងទីក្រុង ដាម៉ាស។ ការវាយប្រហារនេះ បានឆក់យកជីវិតជនស៊ីវិលយ៉ាងហោច ៧នាក់ ក្នុងនោះមានស្ត្រីនិងកុមារ និងមនុស្ស ១១ នាក់ផ្សេងទៀត បានរងរបួស។

ទូរទស្សន៍ Al Hadath ដែលមានមូលដ្ឋាននៅទីក្រុងឌូបៃ បានរាយការណ៍មុននេះថា អគារដែលត្រូវបានវាយប្រហារ គឺស្ថិតនៅចម្ងាយមិនដល់មួយគីឡូម៉ែត្រពីស្ថានទូតអ៊ីរ៉ង់។ បណ្តាញផ្សព្វផ្សាយ បានរាយការណ៍ថា ការវាយប្រហារនេះ ប្រហែលជាសំដៅទៅលើសមាជិកនៃកងជីវពលហេសបូឡានៅប្រទេសលីបង់ ឬមន្ត្រីជាន់ខ្ពស់នៃកងកម្លាំងយោធាសម្រាំងរបស់អង្គភាពឆ្មាំបដិវត្តន៍ឥស្លាមនៃប្រទេសអ៊ីរ៉ង់ (IRGC)។