បន្ទាប់ពីអាជ្ញាធរថៃបានចេញសេចក្តីជូនដំណឹងឱ្យបង្កើនការប្រុងប្រយ័ត្នខ្ពស់ ដោយសារ​តែ​កម្រិត​ទឹកទន្លេ អាចកើនឡើងខ្ពស់នាពេលខាងមុខ។ ក្រសួងការងារ និងបណ្តុះ​បណ្តាល​វិជ្ជា​ជីវៈ​ បានបញ្ជាក់ឲ្យដឹងថា គិតត្រឹមព្រឹកថ្ងៃទី៩ ខែតុលានេះ ក្រសួង​មិន​ទាន់​ទទួល​បាន​ព័ត៌មាន​ថា​មានពលករកម្ពុជារងគ្រោះ ឬមានបញ្ហាដោយសារគ្រោះទឹកជំនន់នេះនៅឡើយទេ។

នៅក្នុងសេចក្តីជូនដំណឹងចេញផ្សាយនៅថ្ងៃនេះ ក្រសួងការងារ និងបណ្តុះបណ្តាលវិជ្ជាជីវៈ ធ្វើការ​ជូន​ដំណឹង​បន្ថែមដល់សាធារណជន ជាពិសេសពលករកម្ពុជាដែលកំពុងស្នាក់នៅ និងធ្វើការនៅ​ប្រទេស​ថៃ​ទាំងអស់ ពិសេសប្រជាពលរដ្ឋដែលរស់នៅតំបន់ចំនួន១៦ នៅក្បែរប្រភពទឹក ជា​ពិសេស​​នៅ​តាមបណ្តោយទន្លេ ចៅបៈយ៉ាក្នុងទីក្រុងបាងកក ឱ្យបង្កើនការប្រុងប្រយ័ត្នខ្ពស់ និង​រៀប​ចំ​ទុកដាក់សម្ភារប្រើប្រាស់នៅកន្លែងមាន សុវត្ថិភាព ដោយសារ​តែ​កម្រិត​ទឹក​ទន្លេ​ចៅ​ប្រះយ៉ា​អាច​កើន​ឡើងខ្ពស់ ចាប់ពីថ្ងៃទី១៣ ដល់ថ្ងៃទី២៣ ខែតុលា ឆ្នាំ២០២៤ខាងមុខ។

ក្រសួងការងារ បាននិងកំពុង​យក​ចិត្ត​ទុកដាក់​តាម​ដាន​ស្ថាន​ការណ៍​វិវត្តន៍ នៃ​កម្រិត​ទឹក​ទន្លេ​ចៅ​ប្រះយ៉ា ដោយបានធ្វើការយ៉ាងជិតស្និទ្ធជាមួយស្ថានទូតកម្ពុជាប្រចាំប្រទេសថៃ និងទីភ្នាក់ងារ​ជ្រើស​រើស​ឯកជនទាំងអស់ ដើម្បីធានាថាពលករកម្ពុជាដែលកំពុងស្នាក់នៅ និងធ្វើការនៅ​តាម​បណ្តោយ​ទន្លេ​ចៅបៈយ៉ាក្នុងទីក្រុងបាងកក និងតំបន់ផ្សេងៗទៀត ទទួលបានការយក​ចិត្ត​ទុក​ដាក់ និងស្ថិតនៅទីកន្លែងមានសុវត្ថិភាព។

ជាមួយនេះ ក្រសួងការងារ និងបណ្តុះបណ្តាលវិជ្ជាជីវៈ បានអំពាវ​នាវ​ដល់​ពលករ​កម្ពុជា​ដែល​កំពុង​ស្នាក់​នៅ និងធ្វើការនៅតាមបណ្តោយទន្លេចៅប្រ ក្នុងទីក្រុងបាងកក និងតំបន់ផ្សេងៗទៀត បង្កើន​ការ​ប្រុងប្រយ័ត្នខ្ពស់ និងបន្តយកចិត្តទុកដាក់តាមដានស្ថានការណ៍ ព្រមទាំង​អនុវត្ត​តាម​ការ​ណែនាំ​រប​ស់​អាជ្ញាធរថៃឱ្យបានខ្ជាប់ខ្ជួន។ ក្នុងករណីទទួលរងផលប៉ះពាល់ ឬទទួលបាន​ព័ត៌មាន​អំពី​ពលករកម្ពុជាដែលរងផលប៉ះពាល់ គឺអាចទាក់ទងបានទៅអនុព័ន្ធការងារ តាមរយៈផេកផ្លូវការ ឬលេខទូរស័ព្ទដែលមានភ្ជាប់ជូនក្នុងសេចក្តីជូនដំណឹងទាំងនេះជាដើម៕