ក្រុមកម្មករនិយោជិតដែលធ្វើកូដកម្មជាង ១.០០០នាក់ នៅឯរោងចក្រ Samsung Electronics នាភាគខាងត្បូងប្រទេសឥណ្ឌា បានច្រានចោលសំណើដំណោះស្រាយដែលធ្វើឡើងដោយក្រុមហ៊ុន ស្ដីអំពីការដំឡើងប្រាក់ឈ្នួល ដោយការអង្គុយតវ៉ាចូលដល់ខែទី២ ហើយ នៅថ្ងៃពុធ (ទី៩ ខែតុលា) នេះ។

កូដកម្មនេះ គឺជាវិវាទការងារបែបនេះដ៏ធំបំផុត ក្នុងរយៈពេលប៉ុន្មានឆ្នាំថ្មីៗនេះ នៅឥណ្ឌា ហើយបានបង្កើតជាស្រមោលបាំងដល់ការជំរុញរបស់នាយករដ្ឋមន្ត្រី លោក Narendra Modi ដែលចង់ទាក់ទាញអ្នកវិនិយោគឲ្យបង្កើតផលិតកម្ម ក្នុងស្រុក។ រដ្ឋ Tamil Nadu ជាកន្លែងដែលក្រុមហ៊ុនបរទេសជាច្រើនធ្វើប្រតិបត្តិការ ក្នុងនោះរួមទាំងក្រុមហ៊ុន Foxconn ផងដែរ មិនអាចដោះស្រាយបញ្ហានេះបានឡើយ រហូតមកទល់ពេលនេះ។

អ្នកធ្វើកូដកម្ម បានបង្អាក់ផលិតកម្ម ហើយតវ៉ាក្នុងតង់បណ្តោះអាសន្ន នៅជិតរោងចក្រ ក្បែរទីក្រុង Chennai ក្នុងរដ្ឋ Tamil Nadu ចាប់តាំងពីថ្ងៃទី៩ ខែកញ្ញា ដោយទាមទារឲ្យដំឡើងប្រាក់ឈ្នួល និងមានការទទួលស្គាល់សហជីព។ រោងចក្រនេះមានសារៈសំខាន់ ចំពោះគោលដៅរបស់ក្រុមហ៊ុន Samsung ហើយបង្កើតបានចំណូលប្រមាណជា ១ភាគ៥ នៃការលក់ចំនួន ១២ពាន់លានដុល្លារ ក្នុងឆ្នាំ២០២២-២០២៣ នៅឥណ្ឌា។

បើយោងតាមសេចក្ដីរាយការណ៍ប្រព័ន្ធផ្សព្វផ្សាយ បានឲ្យដឹងថា ក្រុមហ៊ុន Samsung នៅសប្តាហ៍នេះបានធ្វើសំណើ ដោយផ្តល់ប្រាក់លើកទឹកចិត្តប្រចាំខែចំនួន ៥.០០០រូពី (៦០ដុល្លារ) រហូតដល់ខែមីនា ជិះឡានក្រុងមានម៉ាស៊ីនត្រជាក់បន្ថែមទៀត បញ្ជីមុខម្ហូបអាហារដ្ឋានចម្រុះ និងកាតអំណោយជាទឹកប្រាក់ ២៤ដុល្លារ ក្នុងករណីសម្រាលកូន។

ប៉ុន្តែក្រុមការងារដែលគាំទ្រការតវ៉ា គឺមជ្ឈមណ្ឌលសហជីពពាណិជ្ជកម្មឥណ្ឌា (CITU) បានច្រានចោលកិច្ចព្រមព្រៀងនេះ ដោយសារក្រុមហ៊ុនមិនទទួលស្គាល់សហជីពរបស់ពួកគេ។ នេះបើតាមការលើកឡើងរបស់លោក A. Soundararajan ដែលជាប្រធានសហជីពប្រចាំរដ្ឋនេះ នាថ្ងៃពុធនេះ៕