អ៊ីរ៉ង់៖ រដ្ឋមន្ត្រីការបរទេសអ៊ីរ៉ង់បានអំពាវនាវឱ្យសហរដ្ឋអាមេរិក បើកសោដោះលែងទ្រព្យសម្បត្តិដែលបានបង្កកចំនួន ១០ពាន់លានដុល្លាររបស់ទីក្រុងតេអេរ៉ង់ ដើម្បីបើកផ្លូវសម្រាប់ការវិលត្រឡប់ទៅរកកិច្ចព្រមព្រៀងនុយក្លេអ៊ែរ ជាមួយមហាអំណាចធំៗវិញ។
លោក Hossein Amir-Abdollahian បាននិយាយនៅក្នុងបទសម្ភាសន៍ជាមួយទូរទស្សន៍រដ្ឋ ដែលបានចាក់ផ្សាយកាលពីល្ងាចថ្ងៃសៅរ៍ថា ប្រសិនបើសហរដ្ឋអាមេរិកមានចេតនាពិត នោះពួកគេនឹងយល់ព្រមបញ្ចេញទ្រព្យសម្បត្តិរបស់យើង ឧទាហរណ៍៖ ទឹកប្រាក់ ១០ពាន់លានដុល្លារអាមេរិកដែលជាប់គាំងនៅតាមបណ្ដាធនាគារបរទេស។ លោកថា ប៉ុន្តែអាមេរិកពុំបានត្រៀមខ្លួនដោះលែងប្រាក់ឲ្យមកយើងទេ ដើម្បីធានាថា ពួកគេបានគិតគូរពីផលប្រយោជន៍របស់ប្រជាជនអ៊ីរ៉ង់ យ៉ាងហោចណាស់ម្តងនេះក្នុងមួយទសវត្សរ៍កន្លងមកនេះ។
លោក Amir-Abdollahian ក៏បានព្រមានដែរថា ទីក្រុងតេអេរ៉ង់នឹងប្ដឹងកូរ៉េខាងត្បូង ប្រសិនបើខ្លួននៅតែបន្តបដិសេធមិនសងបំណុលជិត ៨ពាន់លានដុល្លារអាមេរិកសម្រាប់ការទិញប្រេងពីអ៊ីរ៉ង់។ មូលនិធិរបស់អ៊ីរ៉ង់ត្រូវបានបង្កកនៅក្នុងធនាគារកូរ៉េខាងត្បូង។ លោកបាននិយាយថា សម្ពាធរបស់អាមេរិកលើទីក្រុងសេអ៊ូលគឺជាការពិត ប៉ុន្តែយើងមិនអាចបន្តធ្វើគរ ធ្វើថ្លង់ មិនអើពើនឹងបញ្ហានេះបានទេ។ លោកបន្ថែមថា រដ្ឋាភិបាលនឹងអនុញ្ញាតឱ្យធនាគារកណ្តាលចាត់វិធានការផ្លូវច្បាប់ ប្រឆាំងនឹងធនាគារកូរ៉េខាងត្បូងពីរដែលបង្ខាំងមូលនិធិនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
