លោក Eric Mbonigaba បានជាសះស្បើយពីជំងឺអុតស្វា ឬអឹមផក (Mpox) បន្ទាប់ពីសម្រាកព្យាបាល នៅមន្ទីរពេទ្យរយៈពេល ៤សប្តាហ៍ ប៉ុន្តែបុរសមានអាជីពរត់ម៉ូតូឌុបជនជាតិប៊ូរុនឌីរូបនេះ និយាយថា លោកបានក្លាយជាជនរងគ្រោះនៃការភ័យខ្លាចពីការមាក់ងាយ ដោយសារជំងឺនេះ ហើយប្រឈមនឹងការចាកចេញពីផ្ទះសម្បែង និងការបាត់បង់របរចិញ្ចឹមជីវិតប្រចាំថ្ងៃរបស់ខ្លួន។

ជាមនុស្សម្នាក់ក្នុងចំណោមមនុស្សដំបូងគេដែលត្រូវបានធ្វើរោគវិនិច្ឆ័យថា មានជំងឺ Mpox នៅក្នុងប្រទេសប៊ូរុនឌី បញ្ហារបស់លោកបានគូសបញ្ជាក់ពីបញ្ហាប្រឈម ដែលប្រទេសរងផលប៉ះពាល់ខ្លាំងជាងគេទី២របស់ទ្វីបអាហ្រ្វិកមួយនេះ ត្រូវជួបប្រទះ ក្នុងការប្រយុទ្ធប្រឆាំងនឹងជំងឺនេះ។

ឪពុករបស់កូនប្រុសចំនួន ៣នាក់ អាយុចន្លោះ ៣ឆ្នាំ និង ៧ឆ្នាំ ទើបត្រូវបានអនុញ្ញាតឲ្យចេញពីមន្ទីរពេទ្យ កាលពីខែមុន និងបានត្រលប់ទៅផ្ទះរបស់លោកវិញ ក្នុងរដ្ឋធានីហិរញ្ញវត្ថុ Bujumbura របស់ប៊ូរុនឌី តែបែរជាត្រូវស្ត្រីម្ចាស់ផ្ទះរបស់លោកប្រាប់ថា លោកត្រូវតែចាកចេញ។

លោក Mbonigaba វ័យ ៣១ឆ្នាំ បានប្រាប់សារព័ត៌មាន Reuters ថា៖ «គាត់ (ស្ត្រីម្ចាស់ផ្ទះ) បដិសេធមិនជួលផ្ទះឲ្យខ្ញុំទៀតទេ។ ខ្ញុំអាចត្រូវបានដេញចេញពីផ្ទះគ្រប់ពេលវេលា ហើយខ្ញុំមិនមានកន្លែងណា សម្រាប់ឲ្យក្រុមគ្រួសាររបស់ខ្ញុំស្នាក់នៅទេ»។

លោកបាននិយាយថា ស្លាកស្នាមលើផ្ទៃមុខរបស់លោក ដែលបន្សល់ពីដំបៅមានខ្ទុះ ដោយសារជំងឺ Mpox ទំនងជាធ្វើឲ្យអតិថិជនខ្លាចរអា។ មនុស្សជាច្រើនបង្ហាញអាកប្បកិរិយាររើសអើង សូម្បីត្រឹមតែពាក្យស្វាគមន៍លោក។ ហើយលោកប្រាប់ថា មិនមានករណីរបស់លោកតែមួយនោះទេ។ លោក Mbonigaba បាននិយាយថា អ្នកមានជំងឺនេះដូចគ្នាម្នាក់ ក៏ប្រឈមនឹងការបណ្តេញចេញពីម្ចាស់ផ្ទះរបស់គេដែរ។

កាលពីខែមុន មន្ត្រីសុខាភិបាលរបស់អង្គការសហប្រជាជាតិ បានប្រាប់សារព័ត៌មាន Reuters ថា ប្រទេសប៊ូរុនឌី នឹងអាចបញ្ឈប់ការផ្ទុះឡើងនូវជំងឺនេះ ក្នុងរយៈពេលប៉ុន្មានសប្តាហ៍ ប្រសិនបើខ្លួនអាចប្រើប្រាស់ធនធានគ្រប់គ្រាន់ និងដោះស្រាយជាមួយនឹងការភ័យខ្លាចពីមាក់ងាយ ទាក់ទងនឹងជំងឺ Mpox នេះ៕