ឯកអគ្គរដ្ឋទូតរបស់អ៊ុយក្រែន ប្រចាំនៅប្រទេសទួរគី នាថ្ងៃពុធ (ទី៩ ខែតុលា) នេះ បាននិយាយថា ទីក្រុងគីវ មានបំណងរៀបចំកិច្ចប្រជុំកំពូលសន្តិភាពថ្មីមួយ នៅចុងឆ្នាំនេះ ហើយចង់ឲ្យរុស្ស៊ីចូលរួមដែរ នៅលើកនេះ ប៉ុន្តែបានបដិសេធចោលការចរចាទ្វេភាគីដោយផ្ទាល់ជាមួយទីក្រុងមូស្គូ នៅក្នុងកិច្ចប្រជុំនោះ។

ដោយការលុកលុយរបស់រុស្ស៊ីលើអ៊ុយក្រែនស្ថិតនៅក្នុងឆ្នាំទី៣ ប្រទេសទាំង២ នៅតែមានការយល់ឃើញខុសគ្នាឆ្ងាយ អំពីរបៀប ដើម្បីបញ្ចប់សង្រ្គាមនេះ។ ប្រទេសទួរគី ចិន ប្រេស៊ីល និងប្រទេសដទៃទៀត បានស្នើឲ្យមានការសម្របសម្រួល ក្នុងជម្លោះនេះ ឬពិភាក្សាអំពីសំណើសន្តិភាព ប៉ុន្តែមិនមានការវិវត្តន៍ទៅមុខនោះឡើយ។

ប្រទេសអ៊ុយក្រែន កំពុងប្រឹងប្រែងដើរតាម «ផែនការជ័យជម្នះ» របស់ប្រធានាធិបតី លោក Volodymyr Zelenskiy ខណៈដែលប្រធានាធិបតីរុស្ស៊ី លោក Vladimir Putin បាននិយាយថា ការចរចាសន្តិភាព អាចចាប់ផ្តើមបាន លុះត្រាណាតែទីក្រុងគីវ យល់ព្រមបាត់បង់ដែនដីមួយចំនួនធំដែលទីក្រុងមូស្គូទាមទារ ហើយទម្លាក់ចោលការប៉ុនប៉ងរបស់ខ្លួន ដើម្បីចូលរួមជាមួយអង្គការណាតូ។

យ៉ាងណាក្ដី នៅឯសន្និសីទសារព័ទ៌មាន នៅទីក្រុង Ankara តាមរយៈអ្នកបកប្រែទួរគី ឯកអគ្គរដ្ឋទូត លោក Vasyl Bodnar បាននិយាយថា៖ «គោលដៅដ៏សំខាន់បំផុតមួយនៃកិច្ចប្រជុំកំពូលនេះ គឺដើម្បីបានឈានដល់សន្តិភាពប្រកបដោយយុត្តិធម៌ នៅក្នុងអ៊ុយក្រែន។ យើងមិននិយាយអំពីទម្រង់ ដែលអ៊ុយក្រែន និងរុស្ស៊ី អង្គុយទល់មុខគ្នា ហើយអ៊ុយក្រែនស្តាប់ការទាមទាររបស់រុស្ស៊ីនោះទេ»៕