​បាល់ទាត់៖ ក្រុម​គិរីវង់​សុខ​សែន​ជ័យបាន​បន្ដ​បរាជ័យ ៥​ប្រកួត​ផ្ទួនៗក្នុងការ​ប្រកួត Top-8 នៅ​ជើង​ទី​២ នៃ​លី​គ​កំពូល​កម្ពុជា ក្រោយ​បន្ដ​ចាញ់​ក្រុម​អង្គ​រថា​យ​ហ្គឺ​រដោយ​លទ្ធផល ៦-១ លើ​ទឹកដី​របស់ខ្លួនកាលពី​ចុង​សប្ដាហ៍​កន្លងទៅ។​

​ជំនួប​ក្នុង​ដី​លើកចុងក្រោយក្នុង​រដូវ​កាល​ឆ្នាំ​២០២១ នេះ គិរីវង់ត្រូវបាន​ក្រុម​ភ្ញៀវ​ស៊ុត​បំប៉ោង​សំណាញ់​ទី ២​គ្រាប់​មុននៅ​វគ្គ​ទី​១ ដោយ​កីឡាករ ឡុង ម៉េង​ហាវ និង​កីឡាករ មុត សត្យា នៅ​នាទី​១៧ និង​នាទី​៤៥+២។ អ្វីដែល​គួរ​ឲ្យ​ស្ដាយ គិរីវង់បាន​បាត់បង់​សមាជិក​ដ៏​សំខាន់​ម្នាក់នៅ​នាទី​២៦ គឺ​ខ្សែប្រយុទ្ធ Moreira បន្ទាប់ពី​ទទួល​ការពិន័យ​កាត​ក្រហម។​ ​ការ​អវត្តមាន​សមាជិក​ម្នាក់​លើ​ទីលានបានធ្វើ​ឲ្យ​ពួកគេប្រែប្រួល​នូវ​ទម្រង់​លេង ស្របពេល​ក្រុម​អង្គ​រថា​យ​ហ្គឺ​របានដាក់​សម្ពាធ​កាន់តែខ្លាំងរហូត​រកបាន ៤​គ្រាប់​បន្ថែមដោយ​កីឡាករ Iago Mento នៅ​នាទី​៤៨, កីឡាករ Da Cruz រកបាន ២​គ្រាប់នៅ​នាទី​៥៨ និង​នាទី​៧៨ និង ១​គ្រាប់​ទៀតរកបាន​ដោយ​កីឡាករ សុផល ទី​ម៉​ង់ នៅ​នាទី​៦៩។ រីឯ​គិរីវង់វាយបក​បាន ១​គ្រាប់​ប៉ុណ្ណោះដោយ​កីឡាករ ដាវ នី​ម។​

​ការបរាជ័យ​នេះបានធ្វើ​ឲ្យ​ក្រុម​គិរីវង់បន្ដ​ឈរ​លេខ​៨ ដោយ​រក្សា ១៣​ពិន្ទុ​ក្នុង​ដៃដែល​បន្សល់ទុក​មកពី​ជើង​ទី​១ ក្រោយ​ឆ្លងកាត់ ៥​ប្រកួត​នៅ​ជើង​ទី​២ ឬ​វគ្គ Top-8 ពួកគេ​មិនទាន់​ឈ្នះ ឬ​ស្មើ​ម្ដង​ឡើយ។ រីឯ​ក្រុម​អង្គ​រថា​យ​ហ្គឺ​របាន​ពង្រឹង​កៅអី​លេខ​៦ របស់ខ្លួនក្រោយ​រកបាន​ជ័យជម្នះ​ជា​លើក​ទី​២ ក្នុង​វគ្គ Top-8 ដោយមាន ២៧​ពិន្ទុបន្ទាប់ពី​ឆ្លងកាត់​ការប្រកួត​សរុប ១៦​ប្រកួត​ឈ្នះ៨ ស្មើ៣ និង​ចាញ់ ៥​ប្រកួត៕

​អត្ថបទ៖ លី ឈុន​ឡា