E-Sport៖ ព្រឹត្តិការណ៍ MPL KH រដូវកាលទី១ ដែលជាការប្រកួតកីឡាអេឡិចត្រូនិកលក្ខណៈអាជីព លំដាប់អន្ដរជាតិលើកដំបូងនៅកម្ពុជាសម្រាប់វិញ្ញាសា Mobile Legends: Bang Bang បានបញ្ចប់ដោយជោគជ័យលើការរំពឹងទុក បន្ទាប់ពីដំណើរការប្រកួតអស់រយៈពេលជាច្រើនសប្តាហ៍ មុនរកឃើញក្រុមជើងឯកបានទៅក្រុម SeeYouSoon។
ការប្រកួតកីឡាអេឡិចត្រូនិកដ៏ធំនេះ បានចាប់ផ្ដើមការប្រកួតជម្រុះតាំងពីដើមខែសីហារហូតដល់វគ្គសន្សំពិន្ទុ Regular វគ្គ Play-Off វគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រដែលបានបញ្ចប់កាលពីថ្ងៃទី០៣ ខែតុលាម្សិលមិញក្រោមការរៀបចំរបស់ក្រុមហ៊ុន MOONTON។ ហើយជាលទ្ធផលវគ្គផ្ដាច់ព្រ័ត្រ ក្រុម SeeYouSoon បានយកឈ្នះក្រុម DG Quantum ទាំងប្រផិតប្រផើយក្នុងលទ្ធផលបច្ចេកទេស ៣-២ ដើម្បីគ្រងជើងឯក MPL KH រដូវកាលទី១ តែម្ដង។ គណៈកម្មការរៀបចំការប្រកួតបានធ្វើការវាយតម្លៃខ្ពស់ ចំពោះការសន្ទុះចូលរួម និងការគាំទ្រព្រឹត្តិការណ៍ MPL KH រដូវកាលទី១ ដែលនាំឲ្យការប្រកួតនេះក្លាយជាវេទិកាដ៏អស្ចារ្យមិនធ្លាប់មាន និងលើសពីការរំពឹង ថ្វីបើជារដូវកាលដំបូងនៅលើប្រទេសកម្ពុជា ប៉ុន្តែក្រុមទាំងអស់ដែលបានចូលរួមប្រកួតពិតជាមានសមត្ថភាពខ្ពស់ បច្ចេកទេសល្អ និងប្តេជ្ញាចិត្តខ្លាំង។ ដូច្នេះគណៈកម្មការរំពឹងថា ព្រឹត្តិការណ៍នេះនឹងជំរុញឲ្យវិស័យកីឡាអេឡិចត្រូនិកនៅកម្ពុជា កាន់តែមានសកម្មភាពផុលផុស និងរីកចម្រើនខ្លាំងថែមទៀត។
ជាមួយការរៀបចំព្រឹត្តិការណ៍ដ៏ធំនេះដែរ សម្រាប់ក្រុមជើងឯក SeeYouSoon បានទទួលពានជើងឯករួមនឹងមេដាយមាស និងប្រាក់រង្វាន់ ១៥,០០០ដុល្លារ ខណៈក្រុមលេខ២ DG Quantum ទទួលបានមេដាយប្រាក់ និងប្រាក់រង្វាន់ ៧,០០០ដុល្លារ។ រីឯលេខ៣ បានទៅក្រុម Impunity KH ទទួលបានមេដាយសំរឹទ្ធ និងប្រាក់រង្វាន់ ៣,៨០០ដុល្លារ ស្របពេលក្រុមលេខ៤ Burn Gaming ទទួលបានប្រាក់រង្វាន់ ១,៦០០ដុល្លារ។ ចំណែកក្រុមចំណាត់ថ្នាក់លេខ៥-លេខ៦ ក៏ទទួលបានប្រាក់រង្វាន់ ១,២០០ដុល្លារស្មើគ្នា និងក្រុមលេខ៧-លេខ៨ ទទួលប្រាក់រង្វាន់លើកទឹកចិត្ត ៣០០ដុល្លារដូចគ្នា។ សូមបញ្ជាក់ថា ក្នុងនាមជាក្រុមជើងឯក MPL KH រដូវកាលទី១ ក្រុម SeeYouSoon នឹងតំណាងឲ្យប្រទេសកម្ពុជាទៅប្រកួតជើងឯក M3 World Championship ចុងឆ្នាំនេះ។ ជើងឯកពិភពលោក M3 នឹងរៀបចំការប្រកួតនៅខែធ្នូ ដែលមានក្រុមខ្លាំងចំនួន ១៦ តំណាងឲ្យជម្រើសជាតិ ១៦មកពីជុំវិញពិភពលោកចូលរួម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
