​បាល់ទាត់៖ ​ក្លិប​ Watford បានសំរេច​បញ្ចប់​តំណែង​អ្នកចាត់ការ​លោក Xisco Munoz ចេញពី​តំណែង​ហើយ​ក្រោយ​ដឹកនាំ​បាន ១០ខែ​។ បុរស​វ័យ ៤១ឆ្នាំ​សញ្ជាតិ​អេ​ស្ប៉ា​ញ​រូបនេះ​បាន​ជួយ Watford ឡើងមក​កាន់ English Premier League វិញ​កាលពី​រដូវ​កាល​ថ្មី​នេះ​ក្រោយ​ចូលកាន់​តំណែង​នៅ​ខែធ្នូ ​ឆ្នាំ២០២០​។

​​បច្ចុប្បន្ន Watford កំពុង​ឈរ​លេខ ១៤ ក្នុង​តារាង​នៅ​ក្របខណ្ឌ English Premier League ក្រោយ​មាន ៧ពិន្ទុ​ពី​ការប្រកួត ៧លើក​ ខណៈ​ប្រកួត​ចុងក្រោយ​របស់លោក Xisco នៅក្នុង​តំណែង​គឺ Watford ចាញ់​នៅ​ទឹកដី Leeds United ១-០ កាលពី​ថ្ងៃ​សៅរ៍​។ ​លោក Xisco Munoz បានមក​ដល់ Watford កាលពី​ចុងឆ្នាំ២០២០ នោះ​ក្រោយ​ចាក​ចេញពី​ក្លិប​នៅ​ប្រទេស​ហ្ស​ក​ហ្ស៊ី Dinamo Tbilisi​។​ ​លោក Xisco Munoz ក៏បាន​ក្លាយជា​អ្នកចាត់ការ​ទី​១ ដែរ​ក្នុង​រដូវ​កាល​នេះ​ដែល​ត្រូវបាន​បណ្តេញចេញ​នៅ Premier League និង​ជា​អ្នកចាត់ការ​ទី១៣ របស់ Watford តាំងពី​ក្លិប​ត្រូវបាន​កាន់កាប់​ដោយ​គ្រួសារ​ត្រកូល Pozzo តាំងពី​ឆ្នាំ២០១២​។​ ​អ្នក​ដែល​មក​ជំនួស​តំណែង​លោក Munoz នៅ Watford ត្រូវបាន​គេ​រំពឹងថា​ជា​បុរស​សញ្ជាតិ​អ៊ីតាលី Claudio Ranieri ដែល​ធ្លាប់​ដឹកនាំ Leicester City លើក​ពាន Premier League ជា​លើកដំបូង​កាលពី​ឆ្នាំ២០១៦៕

​អត្ថបទ​៖​នាង សុភា​វុ​ធ