សំណល់នៃព្យុះសង្ឃរា ឃើក (Kirk) បានបោកបក់ពាសពេញអឺរ៉ុបខាងលិច កាលពីថ្ងៃពុធ (០៩ តុលា) ដោយបានបង្កការបំផ្លិចបំផ្លាញនៅក្នុងប្រទេសអេស្ប៉ាញ និងព័រទុយហ្គាល់ ហើយបានគំរាមគំហែងបង្កជាទឹកធ្ងន់ធ្ងរដល់ប្រទេសបារាំង។ អាជ្ញាធរបារាំង បានព្រមានសាធារណជនអំពីហានិភ័យខ្ពស់នៃទឹកជំនន់នៅក្នុងតំបន់ជាង៣០។

ក្រុមព្យាករណ៍អាកាសធាតុរដ្ឋរបស់បារាំង បានព្រមានពីខ្យល់កន្រ្តាក់ក្នុងល្បឿន ១២០-១៥០គីឡូម៉ែត្រក្នុងមួយម៉ោង នៅលើតំបន់ជួរភ្នំ ពីរ៉េនីស (Pyrenees) និងរហូតដល់កម្រិត ៩០មីលីម៉ែត្រ (៣,៥អ៊ីញ) នៃភ្លៀងធ្លាក់នៅតំបន់ ពីកាឌី (Picardie) ភាគខាងត្បូង និងតំបន់ដ៏ធំល្វឹងល្វើយ ប៉ារីស (Greater Paris) ដែលនោះបានបង្កើនហានិភ័យនៃទឹកជំនន់។

នៅព័រទុយហ្គាល់ ប្រតិបត្តិករបណ្តាញអគ្គិសនី អ៊ីរ៉េដេស (E-Redes) បានឱ្យដឹងថា មនុស្ស ៤០ម៉ឺននាក់នៅភាគខាងជើងព័រទុយហ្គាល់ ពុំមានអគ្គិសនីប្រើប្រាស់នៅព្រឹកថ្ងៃពុធ ដោយសារសំណល់នៃព្យុះសង្ឃរា Kirk ដែលឥឡូវនេះត្រូវបានចាត់ថ្នាក់ជាព្យុះធម្មតាមួយ។

អាជ្ញាធរការពារស៊ីវិលរបស់ព័រទុយហ្គាល់ បានចុះបញ្ជីឧប្បត្តិហេតុប្រហែល ១.៦០០ករណី ចាប់តាំងពីយប់ថ្ងៃអង្គារ ដែលភាគច្រើនជាការបាក់រលំដើមឈើ ឬមែកឈើបាក់ធ្លាក់បិទផ្លូវ។ សំណល់របស់ព្យុះ Kirk នេះបានវាយប្រហារទ្វីបអឺរ៉ុប ស្របដែលព្យុះសង្ឃរា មីលតុន (Milton) ដ៏មានឥទ្ធិពល បានវាយប្រហារតំបន់ឆ្នេរឈូងសមុទ្ររដ្ឋ Florida របស់សហរដ្ឋអាមេរិក៕