ការវាយប្រហារតាមអាកាសរបស់អ៊ីស្រាអែល បានកំណត់គោលដៅទីតាំងជាច្រើន នៅទូទាំងប្រទេសស៊ីរីនៅព្រឹកថ្ងៃព្រហស្បតិ៍នេះ ដោយបានបណ្តាលឲ្យមនុស្សយ៉ាងហោចណាស់ម្នាក់រងរបួស និងបង្កឲ្យខូចខាតយ៉ាងធ្ងន់ធ្ងរ។ នេះបើយោងតាមទូរទស្សន៍រដ្ឋស៊ីរី។

ការវាយប្រហារដ៏ធំមួយ ត្រូវបានធ្វើទៅលើរោងចក្រផលិតរថយន្ត នៅក្នុងទីក្រុងឧស្សាហកម្មហាស្យា ( Hasyaa) នៅតំបន់ជនបទនៃទីក្រុង Homs។ របាយការណ៍ដំបូងអំពីការរងគ្រោះ បានបញ្ជាក់ថា មនុស្សម្នាក់ បានរងរបួស ហើយរថយន្តជាច្រើនគ្រឿងដែលផ្ទុកដោយសម្ភារៈសង្គ្រោះនិងជំនួយ ត្រូវបានបំផ្លាញ នៅក្នុងការវាយប្រហារនេះ។

ការវាយប្រហារដាច់ដោយឡែកមួយទៀតនៅក្នុងទីប្រជុំជនម៉ារីន ( Maarin )ស្ថិតនៅក្នុងខេត្ត Hama បានបង្កឲ្យមានអគ្គិភ័យដ៏ធំមួយឆាបឆេះឡើង ហើយមិនមានរបាយការណ៍ភ្លាមៗអំពីជនរងគ្រោះនោះទេ។ ទន្ទឹមនឹងនោះ មានការផ្ទុះមួយ ត្រូវបានរាយការណ៍ នៅក្នុងទីក្រុងដារ៉ា( Daraa) ដោយអាជ្ញាធរនៅតែបន្តស៊ើបអង្កេតពីមូលហេតុ។

លើសពីនេះទៀត ទូរទស្សន៍អារ៉ាប៊ីសាអ៊ូឌីត Al-Hadath បានរាយការណ៍ពីការវាយប្រហារលើទីតាំងមួយ ភ្ជាប់ជាមួយក្រុមដែលមានសម្ព័ន្ធភាពជាមួយអ៊ីរ៉ង់ នៅក្នុងតំបន់អាល់ឃីស្វា( Al-Kiswah) ក្បែរទីក្រុង ដាម៉ាស(Damascus)។

ការវាយប្រហារនេះ បានបង្ហាញពីការកើនឡើងភាពតានតឹងជុំថ្មី ដោយទីតាំងជាច្រើន ត្រូវរងការវាយប្រហារជាបន្តបន្ទាប់យ៉ាងឆាប់រហ័ស។