ប្រភពព័ត៌មានរបស់អេហ្ស៊ីប បានប្រាប់ស៊ីនហួក្នុងលក្ខខណ្ឌអនាមិកថា តំណាងមកពីចលនារំដោះជាតិ ប៉ាឡេស្ទីនហ្វាតា (Fatah) និងចលនាតស៊ូឥស្លាមហាម៉ាស (Hamas) បានព្រមព្រៀងគ្នា ក្នុងទីក្រុងគែរ កាលពីថ្ងៃពុធ ដើម្បីបង្កើត «គណៈកម្មាធិការបណ្តោះអាសន្ន និងមិនមែមែននយោបាយ» ដើម្បីគ្រប់គ្រងសេវាកម្មនានាទាក់ទងនឹងតំបន់ហ្កាហ្សាស្ទ្រីប។

ប្រភពនោះ បាននិយាយថា បន្ទាប់ពីកិច្ចប្រជុំដែលធ្វើឡើងក្រោមការឧបត្ថម្ភរបស់អេហ្ស៊ីប ក្រុមប្រឆាំងប៉ាឡេស្ទីនទាំងពីរ បានព្រមព្រៀងគ្នាថា៖«តួនាទីរបស់គណៈកម្មាធិការនេះ នឹងត្រូវបានកំណត់ចំពោះការគ្រប់គ្រងច្រកព្រំដែនរ៉ាហ្វា( Rafah) និងការផ្តល់នូវតម្រូវការចាំបាច់សម្រាប់ប្រជាជនហ្កាហ្សា ក្នុងនោះមានថ្នាំពេទ្យ ការអប់រំ ការថែទាំសុខភាព និងស្បៀងអាហារ»។

ប្រភព បានបន្ថែមថា គណៈកម្មាធិការដែលបានស្នើឡើងនេះ ត្រូវបានគេរំពឹងថា នឹងរួមបញ្ចូលសមាជិកពី ១០ ទៅ ១៥នាក់របស់ក្រុមនីមួយៗ ដោយការតែងតាំងរបស់ពួកគេ កំពុងរង់ចាំការពិភាក្សាបន្ថែមទៀត។

លោកបានពណ៌នាគណៈកម្មាធិការនេះថា ជាដំណោះស្រាយ «ល្អបំផុត និងសមស្របបំផុត» ចំពោះបញ្ហាគ្រប់គ្រងតំបន់ហ្កាហ្សា បន្ទាប់ពីសង្គ្រាម ចំពេលមានការទទូចរបស់អ៊ីស្រាអែល និងសហរដ្ឋអាមេរិក លើការបញ្ចប់ការគ្រប់គ្រងរបស់ក្រុមហាម៉ាស។

គណៈប្រតិភូមកពីក្រុមទាំងពីរនេះ បានមកដល់ទីក្រុងគែរកាលពីថ្ងៃអង្គារ ដើម្បីចរចារអំពីការគ្រប់គ្រងតំបន់ហ្កាហ្សា។ កិច្ចពិភាក្សានេះ មានគោលបំណងបញ្ចប់ភាពខ្វែងគំនិតគ្នារវាងភាគីទាំងពីរទាក់ទងនឹងអភិបាលកិច្ចនៃតំបន់ហ្កាហ្សា និងច្រកឆ្លងកាត់រ៉ាហ្វារវាងដែនដីឆ្នេរសមុទ្រនេះ និងប្រទេសអេហ្ស៊ីប។