នាយករដ្ឋមន្ត្រីប្រទេសអេហ្ស៊ីប លោក Mostafa Madbouly បាននិយាយនៅក្នុងសន្និសីទសារព័ត៌មាននៅក្នុងទីក្រុងគែរ កាលពីថ្ងៃពុធថា ប្រទេសអេហ្ស៊ីប កំពុងប្រឈមមុខភាពតានតឹងផ្នែកសេដ្ឋកិច្ចដែលបណ្តាលមកពីកត្តាជាច្រើនពីខាងក្រៅ ជាពិសេសជម្លោះក្នុងតំបន់ដែលនៅតែបន្ត។

លោកបាននិយាយថា ក្នុងរយៈពេលមួយសប្តាហ៍ តម្លៃប្រេងឆៅបានហក់ឡើង ១០ ភាគរយដល់ជាង ៨០ ដុល្លារអាមេរិកក្នុងមួយបារ៉ែល ដោយសារតែភាពតានតឹងក្នុងតំបន់ ដែលបន្ថែមសម្ពាធលើសេដ្ឋកិច្ចរបស់ប្រទេស។ លោក Madbouly និយាយថា យើងកំពុងប្រឈមមុខទៅនឹងបញ្ហានានាដែលយើងមិនទទួលខុសត្រូវទាល់តែសោះ ប៉ុន្តែយើងត្រូវតែដោះស្រាយជាមួយបញ្ហាទាំងនោះ ដោយសារតែផលប៉ះពាល់ផ្ទាល់របស់វាមកលើយើង។

លោក Madbouly បាននិយាយក្នុងសន្និសីទសារព័ត៌មានថា ទោះបីជាមានបញ្ហាប្រឈមជាច្រើន ក៏ដោយ យើងពិតជាមានការចាប់អារម្មណ៍ខ្លាំងក្នុងការទទួលបានកំណើនសេដ្ឋកិច្ច និងការទាក់ទាញការវិនិយោគ ដោយលោកបានកត់សម្គាល់ថា ស្ថាប័នហិរញ្ញវត្ថុអន្តរជាតិមានទស្សនវិស័យវិជ្ជមានសម្រាប់សេដ្ឋកិច្ចរបស់ប្រទេសអេហ្ស៊ីប។ ប្រទេសអេហ្ស៊ីប រំពឹងថានឹងមានការវិនិយោគពីបរទេសដោយផ្ទាល់ក្នុងទឹកប្រាក់ចំនួន៦៧៥លានដុល្លារក្នុងរយៈពេលប៉ុន្មានសប្តាហ៍ខាងមុខនេះ ពីការផ្តល់អាជ្ញាប័ណ្ណ បណ្តាញ5G ដល់ប្រតិបត្តិករទូរគមនាគមន៍។

ក្នុងរយៈពេលប៉ុន្មានឆ្នាំចុងក្រោយនេះ ប្រទេសអេហ្ស៊ីប បានទទួលរងពីកង្វះរូបិយប័ណ្ណបរទេសដែលត្រូវការសម្រាប់ការនាំចូល ដែលនាំទៅដល់ការទម្លាក់តម្លៃរូបិយប័ណ្ណក្នុងស្រុក និងបង្កឱ្យមានអតិផរណាហក់ឡើងខ្ពស់។