អ្នកជំនាញអង្គការសហប្រជាជាតិ បានព្រមាននៅថ្ងៃព្រហស្បតិ៍ (១០ តុលា) នេះថា កិច្ចខិតខំប្រឹងប្រែងជាសកលដើម្បីបញ្ឈប់សង្គ្រាមស៊ីវិលរបស់សហភាពមីយ៉ាន់ម៉ា គឺ “មិនបានផលនោះទេ” ខណៈជំរុញឱ្យបណ្ដាមេដឹកនាំពិភពលោក ដាក់សម្ពាធរបបសឹកដែលកំពុងកាន់អំណាចលើគ្រប់វិស័យ។

ដោយពណ៌នាអំពីស្ថានភាពមួយដែលកំពុងតែ “អាក្រក់ខ្លាំងឡើងគួរឱ្យរន្ធត់” អ្នករាយការណ៍ពិសេសរបស់អង្គការសហប្រជាជាតិ លោក ថម អាន់ឌ្រូ (Tom Andrews) បាននិយាយថា មនុស្សជាង ៣លាននាក់ ត្រូវបានភៀសខ្លួនដោយការប្រយុទ្ធគ្នានៅក្នុងប្រទេសអាស៊ីអាគ្នេយ៍មួយនេះក្នុងរយៈពេលជាច្រើនឆ្នាំ។

ជម្លោះមីយ៉ាន់ម៉ា ជាចំណុចផ្ដោតសំខាន់ក្នុងកិច្ចប្រជុំអាស៊ាននៅប្រទេសឡាវ ក្នុងសប្តាហ៍នេះ របស់បណ្ដាមេដឹកនាំអាស៊ីអាគ្នេយ៍ ដែលបានជំរុញរបបសឹក និងគូប្រជែងរបស់ខ្លួនឱ្យចាត់វិធានការជាក់ស្តែងដើម្បីបញ្ឈប់ការបង្ហូរឈាម។ ក្នុងអំឡុងដំណើរទស្សនកិច្ចទៅកាន់អូស្ត្រាលី អ្នកជំនាញអង្គការសហប្រជាជាតិរូបនេះបាននិយាយថា របបសឹកបានបាត់បង់ទ័ព “រាប់ម៉ឺននាក់” នៅក្នុងសមរភូមិ ហើយបានងាកទៅកេណ្ឌទាហានបន្ថែមដើម្បីបង្កើតកងកម្លាំងរបស់ខ្លួនឡើងវិញ។

មីយ៉ាន់ម៉ា បានធ្លាក់ចូលទៅក្នុងភាពចលាចល បន្ទាប់ពីរដ្ឋប្រហារយោធាឆ្នាំ២០២១ ក្រោយដណ្តើមអំណាចពីរដ្ឋាភិបាលជាប់ឆ្នោត ដែលបង្កឱ្យមានចលនាតវ៉ាដែលបានវិវត្តទៅជាសង្រ្គាមស៊ីវិលពេញលេញ ខណៈរបបសឹកបានបាត់បង់ការគ្រប់គ្រងលើទឹកដីដ៏ធំ៕