កងកម្លាំងការពារអ៊ីស្រាអែល (IDF) បាននិយាយថា មីស៊ីលប្រហែល ២២០គ្រាប់ ត្រូវបានបាញ់ទៅលើអ៊ីស្រាអែល ចេញពីប្រទេសលីបង់ ក្នុងអំឡុងថ្ងៃពុធ។

កងកម្លាំងការពារអ៊ីស្រាអែល បានបញ្ជាក់ថា៖«គិតត្រឹមម៉ោង ២៣:០០ ថ្ងៃនេះ (ថ្ងៃពុធ ទី៩ ខែតុលា) មីស៊ីលប្រហែល ២២០គ្រាប់ ដែលត្រូវបានបាញ់ដោយអង្គការភេរវកម្មហេសបូឡា បានឆ្លងពីប្រទេសលីបង់ចូលទៅក្នុងប្រទេសអ៊ីស្រាអែល។ សរុបមក ក្រុមហេសបូឡា បានបាញ់មីស៊ីលចំនួន ៣៦០គ្រាប់ ទៅកាន់ទឹកដីអ៊ីស្រាអែល។ «IDF នឹងបន្តការពាររដ្ឋអ៊ីស្រាអែល និងប្រជាជនរបស់ខ្លួនប្រឆាំងនឹងការគំរាមកំហែងដែលបង្កឡើងដោយអង្គការភេរវកម្មហេសបូឡា»។

ការវាយប្រហារដោយមីស៊ីលទ្រង់ទ្រាយធំមួយលើទីក្រុង Kiryat Shmona ក្បែរព្រំដែន បានសម្លាប់អ្នកស្រុកពីរនាក់។ រលកនៃការវាយប្រហារដោយគ្រាប់ផ្លោងមួយទៀត បានធ្វើឡើងទៅលើតំបន់គោលដៅ នៅក្នុងតំបន់ Upper Galilee និងផ្នែកខាងត្បូងតំបន់ខ្ពង់រាប Golan Heights ដែលគ្រប់គ្រងដោយអ៊ីស្រាអែល ហើយមីស៊ីលប្រហែល ៩០គ្រាប់ ត្រូវបានគេបាញ់។