សេវាព័ត៌មានរបស់កងទ័ព បានរាយការណ៍ថា យោធាអ៊ីស្រាអែល បានបំផ្លាញទីតាំងផ្សេងៗគ្នាជាង ៥០០កន្លែងរបស់ក្រុមហេសបូឡា នៅប្រទេសលីបង់ ក្នុងអំឡុងពេលប្រតិបត្តិការជើងគោក នៅភាគខាងត្បូងនៃប្រទេសនេះ។

យោងតាមសេចក្តីថ្លែងការណ៍ នៅក្នុងការវាយតម្លៃរបស់ខ្លួន យោធាបានបំផ្លាញគោលដៅ ដែល«បានបង្កការគំរាមកំហែងដល់សហគមន៍អ៊ីស្រាអែល នៅភាគខាងជើងអ៊ីស្រាអែល»។ ក្នុងចំណោមគោលដៅដែលត្រូវបានបំផ្លាញ មានផ្លូវរូងក្រោមដី ប៉ុស្តិ៍សង្កេតការណ៍យោធា ឃ្លាំងអាវុធ និងហេដ្ឋារចនាសម្ព័ន្ធផ្សេងៗ ទៀត។

កងកម្លាំងការពារអ៊ីស្រាអែល (IDF) បាននិយាយថា កងទ័ពអាកាសអ៊ីស្រាអែល បានធ្វើការវាយប្រហារច្រើនជាង ១.១០០ លើកប្រឆាំងនឹងគោលដៅផ្សេងៗនៅភាគខាងត្បូងប្រទេសលីបង់ ចាប់តាំងពីថ្ងៃទី ០១ ខែតុលា។

កងទ័ព បានពន្យល់ថា ការវាយប្រហារតាមអាកាសទាំងនេះ ធ្វើឡើងដោយយន្តហោះចម្បាំង ឧទ្ធម្ភាគចក្រវាយប្រហារ និងយានដ្រូន ក្នុងការសម្របសម្រួលជាមួយអង្គភាពជើងគោក ដើម្បីគាំទ្រដល់ប្រតិបត្តិការជើងគោកមានកំណត់ ដែលអ៊ីស្រាអែល បានបើកដំណើរការនៅលីបង់ខាងត្បូង កាលពីថ្ងៃទី ០១ ខែ តុលា។

កងទ័ព បាននិយាយថា យោងតាមសេវាសារព័ត៌មាន ក្នុងចំណោមគោលដៅដែលត្រូវបានវាយប្រហារ រួមមាន ឃ្លាំងអាវុធ ផ្លូវរូងក្រោមដី ប៉ុស្តិ៍សង្កេតការណ៍ និងទីតាំងបាញ់ស៊ីបរបស់ក្រុមហេសបូឡា នៃប្រទេសលីបង់ ក៏ដូចជាអង្គភាពប្រដាប់អាវុធមួយចំនួនផងដែរ។