នាយករដ្ឋមន្ត្រីវៀតណាម លោក Pham Minh Chinh បាននិយាយថា ក្នុងខណៈពេលដែលពិភពលោកមានការប្រកួតប្រជែងយ៉ាងខ្លាំងក្លា សមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) នៅតែជាទីកន្លែងដ៏លេចធ្លោ សម្រាប់សេដ្ឋកិច្ចសកល ហើយដើរតួជាកន្លែងភ្ជាប់ទំនាក់ទំនង សម្រាប់កិច្ចសន្ទនា និងកិច្ចសហប្រតិបត្តិការ។

លោក Pham បានថ្លែងយ៉ាងដូច្នេះ នៅឯសម័យប្រជុំពេញអង្គនៃកិច្ចប្រជុំកំពូលអាស៊ានលើកទី៤៤ នៅទីក្រុងវៀងចន្ទន៍ ប្រទេសឡាវ កាលពីថ្ងៃពុធ (ទី៩ ខែតុលា)។

បើយោងតាមអគ្គលេខាធិការអាស៊ាន លោក Kao Kim Hourn (កៅ គឹមហួន) បានឲ្យដឹងថា នៅឆ្នាំ២០២៣ លំហូរវិនិយោគបរទេសសរុបចូលទៅក្នុងអាស៊ាន ដែលជាក្រុមប្រទេសអាស៊ីអាគ្នេយ៍ចំនួន ១០ បានកើនឡើងដល់ ២៣០ពាន់លានដុល្លារ ដោយបានក្លាយជាគោលដៅវិនិយោគដ៏ទាក់ទាញបំផុតទី២ លើពិភពលោក ពោលគឺនៅពីក្រោយសហរដ្ឋអាមេរិកតែប៉ុណ្ណោះ។

ដោយផ្អែកលើការកសាងសមិទ្ធិផលកន្លងមក លោកនាយករដ្ឋមន្ត្រី Pham បានលើកឡើងថា វាជាពេលវេលាដ៏ត្រឹមត្រូវល្អបំផុត សម្រាប់អាស៊ាន ក្នុងការពិចារណាលើភាពធន់ជាមូលដ្ឋានគ្រឹះ ដើម្បីលើកកម្ពស់សមាគម គិតគូរពីការតភ្ជាប់ជាការផ្តោតសំខាន់ ដើម្បីទម្លាយភាពទាល់ច្រកនានា និងសម្លឹងលើនវានុវត្តន៍ជាកម្លាំងចលករ ដើម្បីដើរតួនាទីបើកផ្លូវ និងឈានមុខ។

លោក Pham បានបន្តទៀតថា ភាពធន់ និងស្វ័យភាពជាយុទ្ធសាស្ត្រ គឺជាមូលដ្ឋានគ្រឹះ សម្រាប់អាស៊ាន ដើម្បីឈរយ៉ាងរឹងមាំ ក្នុងការប្រឈមនឹងការប្រែប្រួល និងជម្នះរាល់បញ្ហាប្រឈមនានា។ លោកបានបញ្ជាក់បន្ថែមថា តាមទស្សនៈនោះ អាស៊ានត្រូវពង្រឹងសាមគ្គីភាព និងឯកភាពគ្នា ក្នុងភាពចម្រុះ រក្សាភាពខ្ជាប់ខ្ជួន ចំពោះស្តង់ដារការប្រព្រឹត្ត និងគោលជំហរជាគោលការណ៍របស់ខ្លួន ជុំវិញបញ្ហាតំបន់ និងអន្តរជាតិ។

ជាមួយគ្នានេះ លោក Pham បានអំពាវនាវឲ្យអាស៊ានពង្រឹងសមត្ថភាពធន់ និងលើកកម្ពស់ធនធានផ្ទៃក្នុង ដើម្បីរក្សាស្ថិរភាពជាយុទ្ធសាស្ត្រ និងឆ្លើយតបទាន់ពេលវេលា ចំពោះហានិភ័យពីខាងក្រៅ៕