មន្ត្រីការពារជាតិជាន់ខ្ពស់អាមេរិក ១រូប កាលពីថ្ងៃពុធ (ទី៩ ខែតុលា) បាននិយាយថា ប្រទេសរុស្ស៊ីបានមានអ្នកស្លាប់ និងរបួសជាង ៦០០.០០០នាក់ នៅក្នុងសង្គ្រាមជាមួយអ៊ុយក្រែន។

ការនិយាយពីចំនួនអ្នកស្លាប់ ឬរបួសរបស់រុស្សីនេះ គឺខ្ពស់ជាងការធ្វើបច្ចុប្បន្នភាពផ្លូវការចុងក្រោយពីសហរដ្ឋអាមេរិក ដែលបានប៉ាន់ប្រមាណថា មានអ្នកស្លាប់ និងរបួសជាង ៣០០.០០០នាក់ គិតចាប់តាំងពីសង្រ្គាម បានចាប់ផ្តើម ក្នុងខែកុម្ភៈ ឆ្នាំ២០២២។

មន្ត្រីអាមេរិករូបនោះបានប្រាប់ថា រុស្ស៊ីបានជួបប្រទះនឹងការស្លាប់ និងរបួសច្រើនបន្ថែមទៀត នៅក្នុងខែកញ្ញាឆ្នាំនេះ ដែលច្រើនជាងរយៈពេលដូចគ្នា នៅក្នុងសង្គ្រាមនេះ ហើយបានពន្យល់ថា វាជារឿងសំខាន់ក្នុងការបង្ហាញពីចំនួនអ្នកស្លាប់ និងរបួស បើទោះបីជាវាមិនមែនជា «មាត្រដ្ឋានច្បាស់លាស់» នៃភាពជោគជ័យ នៅក្នុងជម្លោះក៏ដោយ។

មន្ត្រីនោះ បានប្រាប់អ្នកសារព័ត៌មានថា៖ «ប្រធានាធិបតីរុស្ស៊ី លោក Vladimir Putin កំពុងព្យាយាមបញ្ចៀសការកេណ្ឌទ័ពទ្រង់ទ្រាយធំ ដោយសារផលប៉ះពាល់ ដែលនឹងកើតមានលើប្រជាជនក្នុងស្រុករបស់រុស្ស៊ី។ នៅពេលនេះ រូបលោកអាចដំឡើងប្រាក់ឈ្នួលខ្ពស់ ចំពោះទាហានស្ម័គ្រចិត្ត ហើយលោកអាចបន្តបំពេញការងាររបស់កងកម្លាំងទាំងនោះ ដោយមិនមានការកេណ្ឌទ័ពទ្រង់ទ្រាយធំ»។

យ៉ាងណាក្ដី សហរដ្ឋអាមេរិកមិនបានបង្ហាញចំនួនអ្នកស្លាប់ និងរបួសរបស់អ៊ុយក្រែននោះទេ។ ប្រធានាធិបតីអ៊ុយក្រែន លោក Volodymyr Zelensky កាលពីខែកុម្ភៈ បាននិយាយថា ទាហានប្រហែល ៣១.០០០នាក់ ត្រូវបានសម្លាប់៕