នៅថ្ងៃព្រហស្បតិ៍នេះ វិមានក្រឹមឡាំង បានធ្វើការច្រានចោលសេចក្តីរាយការណ៍ថា កូរ៉េខាងជើង បានបញ្ជូនទាហានរបស់ខ្លួនធ្វើសង្រ្គាមឲ្យរុស្ស៊ីនៅប្រទេសអ៊ុយក្រែន ។

លោក Dmitry Peskov គឺជាអ្នកនាំពាក្យវិមានក្រឹមឡាំង និយាយប្រាប់ក្រុមអ្នកសារព័ត៌មានពេលសួរពីសេចក្តីរាយការណ៍នេះថា វាមើលទៅដូចជាព័ត៌មានក្លែងក្លាយមួយទៀតហើយ ។

ទីភ្នាក់ងារ Yonhapរបស់កូរ៉េខាងត្បូង បានរាយការណ៍ថា ប្រមុខការពារជាតិកូរ៉េខាងត្បូងលោក Kim Yong-hyun និយាយកាលពីដើមខែនេះថា កូរ៉េខាងជើងទំនងជាបានបញ្ជូនសមាជិកនៃកងកម្លាំងប្រដាប់អាវុធរបស់ពួកគេ ដើម្បីគាំទ្ររុស្ស៊ី ។

ប្រមុខការពារជាតិរូបនេះ បាននិយាយកាលពីថ្ងៃអង្គារផងដែរថា ទាហានជាច្រើនរបស់កូរ៉េខាងជើង ទំនងជាកំពុងចូលរួមធ្វើសង្រ្គាមជាមួយទាហានរុស្ស៊ី ក្នុងការប្រយុទ្ធនៅអ៊ុយក្រែន ដោយអ្នកខ្លះត្រូវបានគេជឿថា បានស្លាប់ក្នុងសង្រ្គាម និងទាហានជាច្រើនទៀតត្រូវបានរំពឹងថានឹងបញ្ជូនទៅបន្ថែម ។

លោកបាននិយាយប្រាប់សមាជិកសភាថា មានលទ្ធភាពខ្ពស់ដែលថាសេចក្តីរាយការណ៍របស់សារព័ត៌មានអ៊ុយក្រែន គឺជារឿងពិត ។ 

គួរឲ្យដឹងថា ប្រព័ន្ធផ្សព្វផ្សាយអ៊ុយក្រែន បានរាយការណ៍កាលពីចុងសប្តាហ៍កន្លងទៅថា មន្ត្រីយោធាកូរ៉េខាងជើង ៦នាក់ ត្រូវបានសម្លាប់នៅក្នុងការវាយប្រហារដោយមីស៊ីលរបស់ទីក្រុងគីវ លើទឹកដីកាន់កាប់ដោយរុស្ស៊ី នៅជិតតំបន់ Donetsk កាលពីថ្ងៃទី ៣ ខែតុលា ។ 

សូមបញ្ជាក់ថា ក្រុមអ្នកជំនាញ បាននិយាយជាយូរមកហើយថា មីស៊ីលកូរ៉េខាងជើង កំពុងត្រូវបានដាក់ពង្រាយក្នុងទឹកដីអ៊ុយក្រែន ដោយកងកម្លាំងរុស្ស៊ី គឺជាអំណះអំណាងមួយដែលទីក្រុងម៉ូស្គូ និងទីក្រុងព្យុងយ៉ាង បានបដិសេធចោលទាំងស្រុង ៕