នៅថ្ងៃព្រហស្បតិ៍នេះ កងទ័ពអ៊ីស្រាអែល បានបញ្ចេញរូបភាពវីដេអូឃ្លីបឃើញការវាយប្រហារដែលកងទ័ពរបស់ពួកគេនិយាយថា វាគឺជាការផ្ទុះឃ្លាំងស្តុកអាវុធរបស់ក្រុមហេសបូឡា នៅក្នុងប្រទេសលីបង់ ។

ទោះបីជាយ៉ាងណាក៏ដោយ ទីភ្នាក់ងារព័ត៌មានរ៉យទ័រ ពុំអាចបញ្ជាក់ផ្ទៀងផ្ទាត់ដោយឯករាជ្យបានឡើយទីកន្លែង និងពេលវេលានៃការថតវីដេអូមួយនេះ ។

អ៊ីស្រាអែល បានបើកការវាយប្រហារតាមជើងគោកចូលទៅក្នុងប្រទេសលីបង់ កាលពីថ្ងៃទី ៣០ ខែកញ្ញា ក្រោយការផ្ទុះអាវុធឆ្លងព្រំដែនរយៈពេលជិត ១ឆ្នាំ រវាងក្រុមហេសបូឡា និងកងកម្លាំងអ៊ីស្រាអែល ។

ការប៉ះទង្គិចគ្នាផ្លូវគោករវាងកងកម្លាំងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ បានរីករាលដល់សមរភូមិមុខតំបន់ភ្នំនៅភាគខាងត្បូងលីបង់ ស្របពេលដែលតំបន់មជ្ឈិមបូព៌ា ស្ថិតក្នុងការប្រុងប្រយ័ត្នខ្ពស់ រង់ចាំការឆ្លើយតបរបស់អ៊ីស្រាអែលចំពោះការវាយប្រហារដោយមីស៊ីលរបស់អ៊ីរ៉ង់កាលពីសប្តាហ៍មុន ។

អំឡុងការជជែកគ្នាតាមទូរស័ព្ទកាលពីថ្ងៃពុធ ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្រ្តីអ៊ីស្រាអែលលោក Benjamin Netanyahu បានជជែកគ្នាពីការសងសឹកដ៏មានសក្តានុពលរបស់អ៊ីស្រាអែលលើអ៊ីរ៉ង់ ។ ជំនួបតាមទូរស័ព្ទមួយនេះ ភាគីទាំង ២ រៀបរាប់ថាវិជ្ជមាន ។

ក្នុងជំនួបតាមទូរស័ព្ទ មានរយៈពេល ៣០ នាទី និងជាជំនួបដំបូងសម្រាប់លោក Biden និង លោកNetanyahu ចាប់តាំងពីខែសីហា និងស្របពេលការកើនឡើងយ៉ាងខ្លាំងនៃជម្លោះរបស់អ៊ីស្រាអែលជាមួយអ៊ីរ៉ង់ និងក្រុមហេសបូឡានៅលីបង់គាំទ្រដោយអ៊ីរ៉ង់ ប៉ុន្តែពុំមានសញ្ញានៃបទឈប់បាញ់ដែលនឹងបញ្ចប់ជម្លោះជាមួយក្រុមហាម៉ាសគាំទ្រដោយអ៊ីរ៉ង់ នៅដែនដីហ្កាហ្សានោះទេ ៕