ក្រសួងការបរទេសចិន និយាយនៅថ្ងៃព្រហស្បតិ៍នេះថា ខ្លួននឹងធ្វើការជាមួយក្រុមអាជ្ញាធរប៉ាគីស្ថាន ដើម្បីការពារសុវតិ្ថភាព និងសន្តិសុខបុគ្គលិកចិន គម្រោង និងស្ថាប័នរបស់ពួកគេនៅក្នុងប្រទេសមួយនេះ ។

សេចក្តីអត្ថាធិប្បាយនេះ បានកើតមានឡើង ក្រោយការសម្លាប់វិស្វករចិន ២រូប ត្រូវបានប្រកាសទទួលស្គាល់ដោយក្រុមជីវពលផ្តាច់ខ្លួនកាលពីថ្ងៃអាទិត្យ ។

អ្នកនាំពាក្យក្រសួងការបរទេសចិនអ្នកស្រី Mao Ning បាននិយាយប្រាប់សន្និសីទសារព័ត៌មាននាទីក្រុងប៉េកាំងថា អ្នកស្រីពុំបានដឹងពីសេចក្តីរាយការណ៍ថា ក្រុមអាជ្ញាធរប៉ាគីស្ថាននឹងព្យាយាមទប់ស្កាត់ការធ្វើបំលាស់ទីរបស់ពលរដ្ឋចិន អំឡុងជំនួបអង្គការកិច្ចសហប្រតិបត្តិការសៀងហៃនៅសប្តាហ៍ក្រោយ ដោយសារតែហានិភ័យសន្តិសុខគំរាមកំហែងពីក្រុមជីវពលដែលមានគោលដៅលើពួកគេ ។

ការសម្រេចចិត្តបែបនេះ បានកើតមានឡើង ក្រោយការសម្លាប់វិស្វករចិន ២រូបនៅក្នុងហេតុការណ៍បំផ្ទុះគ្រាប់បែកជិតអាកាសយានដ្ឋានក្រុងការ៉ាឈី ប្រទេសប៉ាគីស្ថាន ដែលត្រូវបានប្រកាសទទួលស្គាល់ដោយក្រុមជីវពលផ្តាច់ខ្លួន និងជាកងទ័ពរំដោះ Baloch (BLA) ៕