យោធារបស់ទីក្រុងគីវ កាលពីយប់ថ្ងៃពុធ (ទី៩ ខែតុលា) បាននិយាយថា កងកម្លាំងអ៊ុយក្រែនដែលមានចំនួនតិចជាង កំពុងទប់ទល់ការវាយលុកដោយទាហានរុស្ស៊ី នៅខាងក្នុងទីក្រុងយុទ្ធសាស្ត្រ Toretsk ខណៈដែលរុស្ស៊ីបន្តវាយលុកយ៉ាងខ្លាំងក្លា នៅភាគខាងកើតនៃប្រទេសអ៊ុយក្រែន។

កងទ័ពវិមានក្រឹមឡាំង បាន និងកំពុងដណ្តើមគ្រប់គ្រងពីភូមិទៅភូមិ ក្នុងតំបន់ ដែលជាបេះដូងនៃឧស្សាហកម្មរបស់អ៊ុយក្រែន នៅក្នុងប្រតិបត្តិការយុទ្ធសាស្ត្រវាយបំបែកការការពារសំខាន់ៗ និងគំរាមកំហែងផ្លូវឆ្លងកាត់ដែលមានសារៈសំខាន់ ចំពោះកងកម្លាំងរបស់ទីក្រុងគីវ នៅទីនោះ។

អ្នកនាំពាក្យយោធា លោកស្រី Anastasia Bobovnikova បានប្រាប់សារព័ត៌មាន Reuters ថា ការប្រយុទ្ធគ្នាតាមដងផ្លូវ បានកើតមានឡើង នៅក្នុងទីក្រុងសមរភូមិជួរមុខ Toretsk ចាប់តាំងពីឆ្នាំ២០១៤ ដោយកងទ័ពរុស្ស៊ីបានរុលទៅមុខ និង «បំផ្លាញអគារ និងរចនាសម្ព័ន្ធទាំងស្រុង»។

អ្នកវិភាគយោធាបានលើកឡើងថា ការដណ្ដើមបានតំបន់ខ្ពង់រាប Toretsk នឹងអនុញ្ញាតឲ្យទីក្រុងមូស្គូរារាំងបន្ថែមទៀតនូវខ្សែច្រវាក់ផ្គត់ផ្គង់ ដែលតភ្ជាប់ផ្នែកខាងក្រោយប្រតិបត្តិការជាមួយកងកម្លាំងអ៊ុយក្រែននៅភាគខាងកើតភាគច្រើន។

ជាមួយគ្នានេះ កងកម្លាំងរុស្ស៊ីក៏កំពុងដាក់សម្ពាធលើទីក្រុងយុទ្ធសាស្ត្រមួយផ្សេងទៀត គឺទីក្រុង Pokrovsk ដែលស្ថិតនៅចុងម្ខាងទៀតនៃផ្លូវនោះ។

លោកស្រី Bobovnikova បានបន្ថែមថា អ្នកស្រុកជាង ១.០០០នាក់ នៅតែស្ថិតក្នុងទីក្រុង Toretsk ក្នុងចំណោមប្រជាជនមុនសង្គ្រាមប្រហែល ៦០.០០០នាក់ ប៉ុន្តែការជម្លៀសពួកគេ គឺ «ពិបាកខ្លាំងណាស់» ដោយសារការបាញ់ផ្លោងរបស់រុស្ស៊ីមិនបានកំណត់ច្បាស់លាស់នោះឡើយ៕