​​វាយ​សី៖ ​ក្រុម​វាយ​សី​ចិន ទីបំផុត​អាច​ការពារ​តំណែង​ជើងឯក​ព្រឹត្តិការណ៍​វាយ​សី​ពានរង្វាន់ Sudirman Cup ដែល​រៀបចំឡើង​នៅ​ប្រទេស​ហ្វាំ​ង​ឡង់​បាន​សំរេចក្រោយ​យកឈ្នះ​ក្រុម​ជប៉ុន​នៅ​វគ្គ​ផ្តាច់ព្រ័ត្រ​។

​​ការប្រកួត​វាយ​គូ​បុរស​ដែលមាន​ដៃគូ​កីឡាករ​ចិន Zhou Hao Dong និង He Ji Ting បាន​យកឈ្នះ​គូប្រកួត​ជប៉ុន​ដែលមាន​កីឡាករ Takuro Hoki និង Yugo Kobayashi ដោយ​លទ្ធផល ២១-១៧, ១៤-២១, និង ២១-១៦ ធ្វើឱ្យ​ចិន​នាំមុខ ១-០​។​ ​ឈានចូល​ការប្រកួត​វិញ្ញាសា​វាយ​ទោល​នារី​ជប៉ុន​តាម​ស្មើ​វិញ​ដោយ​កីឡាការិនី Akane Yamaguchi យកឈ្នះ​កីឡាការិនី​ចិន Chen Yu Fei ដោយ​លទ្ធផល ២១-១៩, និង ២១-១៦ មានន័យថា​ស្មើគ្នា ១-១​។​ ​មកដល់​ការប្រកួត​ផ្នែក​បុរស​ឯកត្តជន​ចិន​បាន​នាំមុខ ២-១ វិញ​ក្រោយ​កីឡាករ Shi Yu Qi យកឈ្នះ​កីឡាករ​ជប៉ុន Keno Momota ២១-១៣, ៨-២១ និង ២១-១២​។

​​វិញ្ញាសា​បន្ត​គឺ​វាយ​គូ​នារី ម្ចាស់​មេដាយប្រាក់​អូឡាំពិក​ទីក្រុង​តូ​ក្យូ​ក្រុម​ចិន Jia Yi Fan និង​កីឡាការិនី Chen Qing Chen បាន​បន្ត​យកឈ្នះ​ដៃគូ​កីឡាការិនី​ជប៉ុន​ពីរ​នាក់​បងប្អូន Mayu Matsumoto និង Misaki Matsumoto លទ្ធផល ២១-១៧ និង ២១-១៦ មានន័យថា​ចិន​យកឈ្នះ​ក្នុង Series វគ្គ​ផ្តាច់ព្រ័ត្រ​នេះ ៣-១​។​ ​នេះ​ជា​ជើងឯក​ពានរង្វាន់ Sudirman Cup លើក​ទី១២ សំរាប់​ក្រុម​ចិន និង​ជា​ជើងឯក​ច្រើន​ជាង​គេ​ផងដែរ​។ ក្រៅពីនោះ​កូរ៉េខាងត្បូង​ធ្លាប់​ឈ្នះ ៤ដង ឥណ្ឌូនេស៊ី​ឈ្នះ​ម្តង​តាំងពី​ពានរង្វាន់​នេះ​បង្កើតឡើង​នៅ​ឆ្នាំ១៩៨៩ ដែល​រៀបចំឡើង ២ឆ្នាំ​ម្តង​៕

​អត្ថបទ​៖​នាង សុភា​វុ​ធ