អ្នកនាំពាក្យរបស់នាយករដ្ឋមន្ត្រីអង់គ្លេស បាននិយាយថា លោក Keir Starmer និងប្រធានាធិបតីអ៊ុយក្រែន លោក Volodymyr Zelenskiy បានពិភាក្សាគ្នា អំពីការគាំទ្រដែលអ៊ុយក្រែនត្រូវការ ក្នុងសង្គ្រាមប្រឆាំងនឹងរុស្ស៊ី ក្នុងរយៈពេលប៉ុន្មានខែខាងមុខនេះ អំឡុងកិច្ចពិភាក្សា នៅទីក្រុងឡុងដ្រ៍ នាថ្ងៃព្រហស្បតិ៍ (ទី១០ ខែតុលា) នេះ។

ជាមួយគ្នានេះ អ្នកនាំពាក្យក៏បានលើកឡើងជាម្ដងទៀតនូវទស្សនៈរបស់ចក្រភពអង់គ្លេស ដែលថា ក្នុងកាលៈទេសៈជាក់លាក់ណាមួយ អ៊ុយក្រែនមានសិទ្ធិវាយប្រហារលើគោលដៅនានា ក្នុងដែនដីរុស្ស៊ី ប៉ុន្តែបាននិយាយថា គោលជំហររបស់ចក្រភពអង់គ្លេសលើការប្រើប្រាស់មីស៊ីលរយៈចម្ងាយឆ្ងាយ Storm Shadow របស់ខ្លួន មិនផ្លាស់ប្តូរនោះទេ។

អ្នកនាំពាក្យរូបនោះបាននិយាយថា៖ «យើងច្បាស់ជាចង់ឲ្យអ៊ុយក្រែនឈរក្នុងទីតាំងដ៏ខ្លាំងក្លាបំផុត។ ប៉ុន្តែគ្មានសង្រ្គាមណាមួយ ត្រូវបានឈ្នះដោយអាវុធតែម្យ៉ាងនោះទេ។ ហើយជាពិសេសពាក់ព័ន្ធនឹងមីស៊ីល Storm Shadow មិនមានការផ្លាស់ប្តូរនោះទេ ចំពោះជំហររបស់រដ្ឋាភិបាលចក្រភពអង់គ្លេស ជុំវិញការប្រើប្រាស់មីស៊ីលរយៈចម្ងាយឆ្ងាយនេះ»។

សម្រាប់លោក Zelenskiy មេដឹកនាំអ៊ុយក្រែនរូបនេះ ក៏បានជួបជាមួយអគ្គលេខាធិការអង្គការណាតូ លោក Mark Rutte នៅឯទីក្រុងឡុងដ្រ៍នោះផងដែរ។ ហើយនៅពេលត្រូវបានសួរ អំពីការប្រើប្រាស់អាវុធរយៈចម្ងាយឆ្ងាយ លោក Rutte បានឆ្លើយប្រាប់អ្នកសារព័ត៌មានថា៖ «យើងបានពិភាក្សាអំពីវា នៅថ្ងៃនេះ ប៉ុន្តែចុងក្រោយ វាអាស្រ័យលើសម្ព័ន្ធមិត្តផ្ទាល់»៕