ទិន្នន័យចុងក្រោយរបស់អង្គការសហប្រជាជាតិ(UN)បង្ហាញថា ជាង ៦០ភាគរយនៃដីចម្ការដំណាំនៅតំបន់ហ្កាហ្សា បានរងការខូចខាតដោយសារជម្លោះកំពុងបន្ត ធ្វើឲ្យមនុស្ស ២លាននាក់ ត្រូវការបន្ទាន់ស្បៀងអាហារ គិតត្រឹមខែកញ្ញាកន្លងទៅ ។

ទិន្នន័យផ្កាយរណបប្រមូលបានដោយអង្គការស្បៀងអាហារ និងកសិកម្មនៃអង្គការសហប្រជាជាតិ(FAO) និងមន្ទីរផ្កាយរណបអង្គការសហប្រជាជាតិ(UNOSAT) ឃើញ ការខូចខាតទ្រង់ទ្រាយធំដល់ផលិតផលកសិកម្ម ធ្វើឲ្យវិបត្តិមនុស្សធម៌ និងស្រេកឃ្លាន កាន់តែអាក្រក់ខ្លាំង ។

ទិន្នន័យបង្ហាញថា ៥២,៥ភាគរយនៃអណ្តូងកសិកម្ម និង ៤៤,៣ភាគនៃផ្ទះកញ្ចក់ រងការខូចខាត គ្មានសេសសល់ ។

អសមត្ថភាពនៃការចូលដល់ស្បៀងអាហារ បានធ្វើឲ្យប៉ះពាល់ដល់វិស័យបសុបក្សី ខណៈអ្នកស្រុកហ្កាហ្សា ពិបាកចិញ្ចឹមសត្វរបស់ពួកគេ ។

អ្នកស្រី Ward Saeedគឺជាអ្នកចិញ្ចឹមបសុសត្វមួយរូបនៅតំបន់ហ្កាហ្សា និយាយថា ពួកយើងបានជម្លៀសខ្លួន និងបានផ្លាស់ទីលំនៅទៅកាន់តំបន់ភាគខាងត្បូង ដោយសារសង្រ្គាម ។ ពួកយើងបាននាំសត្វទៅជាមួយពួកយើង ប៉ុន្តែពួកយើងបានបាត់បង់ពួកវាពាក់កណ្តាលនៅតាមផ្លូវ ។

អ្នកស្រីបន្តថា ទាំងនេះ គឺជាសត្វដែលនៅសេសសល់ ហើយពួកយើងធ្លាប់ពឹងផ្អែកលើសត្វចៀមរបស់ពួកយើង ពួកវាគឺជាប្រភពនៃការរស់នៅរបស់ពួកយើង ជីវិតរបស់ពួកយើង ក្រឡឹងតែជុំវិញសត្វចៀម ពួកវាផ្តល់ប្រាក់ចំណូលដល់ពួកយើង ពួកយើងឲ្យចំណីពួកវា និងថែទាំពួកវា តែឥឡូវលែងអាចដូចកាលពីមុនទៀតហើយ ។

ដោយឡែក អ្នកស្រី Akmah El-Hamidi គឺជាកសិករមួយរូបទៀតនៅតំបន់ហ្កាហ្សា និយាយថា គ្មានចំណីចិញ្ចឹមសត្វនោះទេ គ្មានចំបើង គ្មានស្មៅងាប់ទៀតទេ ។ ពួកយើងធ្លាប់មានសត្វចិញ្ចឹម ៤០ក្បាល ប៉ុន្តែឥឡូវនេះ សល់តែ ២០ក្បាលទេ ហើយអាចនឹងមានចំនួនតិចជាងនេះបន្ថែមទៀត ៕