ប្រទេសចិន កាលពីថ្ងៃព្រហស្បតិ៍ (១០ តុលា) បានថ្កោលទោសមេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) សម្រាប់ “ភាពរឹងរូសក្រាញននៀលពត់មិនត្រង់” របស់ខ្លួនលើឯករាជ្យភាពរបស់កោះ បន្ទាប់ពីលោកបានប្តេជ្ញា “ទប់ទល់នឹងការបញ្ចូលឧបសម្ព័ន្ធ” នៅក្នុងសុន្ទរកថាដែលប្រារព្ធទិវាជាតិរបស់កោះស្វ័យគ្រប់គ្រងមួយនេះ។

ចិនមិនបានច្រានចោលការប្រើកម្លាំងដើម្បីនាំយកកោះនេះមកក្រោមការគ្រប់គ្រងរបស់ខ្លួនឡើយ ក្នុងពេលដែលលោក Lai និងរដ្ឋាភិបាលទីក្រុងតៃប៉ិ បន្តប្រឆាំង។

អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានប្រាប់សន្និសីទសារព័ត៌មានជាប្រចាំថ្ងៃថា៖ សុន្ទរកថារបស់លោក Lai “បានលាតត្រដាងពីជំហរដ៏រឹងរូសពត់មិនត្រង់របស់លោកចំពោះឯករាជ្យភាពកោះតៃវ៉ាន់ និងចេតនាដ៏អាក្រក់ក្នុងការបង្កើនភាពតានតឹងនៅច្រកសមុទ្រតៃវ៉ាន់ ដើម្បីផលប្រយោជន៍ផ្ទាល់ខ្លួនផ្នែកនយោបាយ”។

លោកស្រី Mao បន្ថែមថា “តំបន់តៃវ៉ាន់ មិនធ្លាប់ជាប្រទេសទេ ហើយក៏នឹងមិនអាចក្លាយជាប្រទេសបានឡើយ ដូច្នេះហើយកោះនេះមិនមាន “អធិបតេយ្យភាព” អ្វីនោះទេ។

ទីក្រុងប៉េកាំង បានបង្កើនសម្ពាធលើកោះតៃវ៉ាន់ ឱ្យទទួលយកការអះអាងសិទ្ធិរបស់ខ្លួន ហើយទំនាក់ទំនងនៅតែតានតឹងនៅក្រោមការដឹកនាំរបស់លោក Lai ដែលចូលកាន់តំណែងកាលពីខែឧសភា។ ទីក្រុងប៉េកាំងបានបញ្ជាក់ម្ដងទៀតបន្ទាប់ពីសុន្ទរកថារបស់លោក Lai ថា “កោះតៃវ៉ាន់គឺជាផ្នែកដែលមិនអាចកាត់ផ្តាច់បាននៃទឹកដីចិន” ហើយការបង្រួបបង្រួមរវាងដីកោះ និងដីគោក គឺ “ជៀសមិនរួច”៕