អតីតប្រធានាធិបតីអាមេរិក លោក បារ៉ាក់ អូបាម៉ា បានជួយកៀរគរអ្នកបោះឆ្នោតសម្រាប់អនុប្រធានាធិបតី លោកស្រី កាម៉ាឡា ហារីស កាលពីថ្ងៃព្រហស្បតិ៍ (១០ តុលា) ដោយនិយាយរិះគន់ប្រឆាំងនឹងលោក ដូណាល់ ត្រាំ ក្នុងអំឡុងព្រឹត្តិការណ៍ជួបជុំមួយនៅឯបរិវេណមហាវិទ្យាល័យ ភីតស្បើក (Pittsburgh) នៃរដ្ឋប្រទាញប្រទង់ ផិនស៊ីលវេនៀ (Pennsylvania) ក្នុងគោលបំណងមួយផ្នែកដើម្បីជំរុញយុវជនឱ្យទៅបោះឆ្នោតនៅថ្ងៃទី០៥ ខែវិច្ឆិកា។

លោក អូបាម៉ា គឺជាអ្នកគាំទ្រដ៏មានឥទ្ធិពលមួយរូបរបស់លោកស្រី ហារីស ចាប់តាំងពីទទួលបានបេក្ខភាពពីបក្សប្រជាធិបតេយ្យ បន្ទាប់ពីលោកប្រធានាធិបតី ចូ បៃដិន បានដកខ្លួនកាលពីខែកក្កដា ក្រោយធ្វើមិនបានល្អក្នុងការជជែកដេញដោលប្រឆាំងនឹងលោក ត្រាំ ដែលជាបេក្ខភាពរបស់បក្សសាធារណរដ្ឋ។

លោក អូបាម៉ា លើកឡើងថា លោក ត្រាំ យកចិត្តទុកដាក់តែលើខ្លួនឯង និងរឿងលុយកាក់ប៉ុណ្ណោះ។ លោកសង្កត់ធ្ងន់ថា លោកស្រី ហារីស បានធំឡើងនៅក្នុងវណ្ណៈកណ្តាល ហើយជឿជាក់លើតម្លៃរបស់ពលរដ្ឋអាមេរិក ដែលផ្ទុយនឹងវោហាសាស្រ្តប្រឌិតរបស់លោក ត្រាំ និងការប៉ុនប៉ងបោកប្រាស់ដោយចេតនា រួមទាំងថ្មីៗនេះពីការចោទប្រកាន់មិនពិតលើការឆ្លើយតបរបស់រដ្ឋាភិបាលចំពោះព្យុះសង្ឃរា។

លោក អូបាម៉ា ដែលអាណត្តិនៅសេតវិមានរបស់ខ្លួនបានបញ្ចប់ក្នុងឆ្នាំ២០១៧ នៅតែមានប្រជាប្រិយភាពជាមួយនឹងមូលដ្ឋានគណបក្សរបស់លោក។ កម្មវិធីជួបជុំនៅសាកលវិទ្យាល័យ Pittsburgh របស់លោក អូបាម៉ា ដែលធ្វើឡើងក្នុងពេលដែលលោកស្រី Harris ធ្វើយុទ្ធនាការនៅរដ្ឋ Nevada និង Arizona នេះ គឺជាព្រឹត្តិការណ៍ដំបូងគេក្នុងចំណោមព្រឹត្តិការណ៍ជាច្រើនដែលលោកគ្រោងនឹងធ្វើនៅក្នុងបណ្ដារដ្ឋប្រទាញប្រទង់ក្នុងប៉ុន្មានសប្តាហ៍ខាងមុខ៕