ប្រធានាធិបតីអ៊ុយក្រែនលោក Volodymyr Zelenskiy បាននិយាយកាលពីថ្ងៃព្រហស្បតិ៍ ថា បទឈប់បាញ់ជាមួយរុស្ស៊ីមិនស្ថិតក្រោមកិច្ចពិភាក្សាជាមួយសម្ព័ន្ធមិត្តអឺរ៉ុបទេ និងបានជំរុញឱ្យមានការគាំទ្រពីសំណាក់ប្រទេសលោកខាងលិចបន្ថែមទៀត នៅមុនរដូវរងាដ៏លំបាក ក្នុងអំឡុងពេលដំណើរទស្សនកិច្ចរបស់លោក ទៅកាន់រដ្ឋធានីចំនួនបួន។

លោក Zelenskiy កំពុងស្វែងរកការជំរុញផ្នែកយោធា និងហិរញ្ញវត្ថុ ក្នុងអំឡុងដំណើរទស្សនកិច្ចរយៈពេល៤៨ម៉ោងទៅកាន់ទីក្រុងឡុងដ៍ចក្រភពអង់គ្លេស ទីក្រុងប៉ារីសប្រទេសបារាំង ទីក្រុងរ៉ូមប្រទេសអ៊ីតាលី និងទីក្រុងប៊ែរឡាំងប្រទេសអាល្លឺម៉ង់ ក្នុងពេលមានការព្រួយបារម្ភអំពីការថយចុះនៃការគាំទ្រ ប្រសិនបើលោក ដូណាល់ ត្រាំ ឈ្នះតំណែងប្រធានាធិបតីសហរដ្ឋអាមេរិក នៅខែក្រោយ។

ប្រធានាធិបតីអ៊ុយក្រែន បានធ្វើដំណើរទៅទីក្រុងរ៉ូមសម្រាប់អាហារពេលល្ងាចពិភាក្សាការងារជាមួយ លោកស្រី Giorgia Meloni បន្ទាប់មកនាយករដ្ឋមន្រ្តីអ៊ីតាលី បានប្រកាសថាទីក្រុងរ៉ូមនឹងធ្វើជាម្ចាស់ផ្ទះ «សន្និសីទស្តារឡើងវិញ» ដើម្បីជួយដល់ការកសាងឡើងវិញនៅអ៊ុយក្រែន នៅថ្ងៃទី ១០ដល់ថ្ងៃទី១១ ខែកក្កដា ឆ្នាំ២០២៥។

នៅមុនពេលនោះ លោក Zelenskiy បានពិភាក្សាជាមួយប្រធានាធិបតីបារាំង លោក Emmanuel Macron នៅទីក្រុងប៉ារីស បន្ទាប់មកលោកបានបដិសេធការរាយការណ៍ទៅប្រព័ន្ធផ្សព្វផ្សាយ ថាលោកមិនកំពុងពិភាក្សាអំពីលក្ខខណ្ឌនៃបទឈប់បាញ់ជាមួយរុស្ស៊ីនោះទេ។

លោកបានប្រាប់សារព័ត៌មានក្នុងរដ្ឋធានីប្រទេសបារាំងថា «នេះពុំមែនជាប្រធានបទនៃការពិភាក្សារបស់យើងទេ»។ លោកZelenskiy បានច្រានចោលផែនការសន្តិភាពណាមួយដែលពាក់ព័ន្ធនឹងការប្រគល់ទឹកដីទៅឱ្យរុស្ស៊ី ដោយលើកហេតុផលថា ទីក្រុងមូស្គូត្រូវតែដកកងទ័ពទាំងអស់ចេញពីទឹកដីអ៊ុយក្រែនជាមុនសិន។ លោក Zelenskiy បាននិយាយថា លោកនិង លោក Macron បានពិភាក្សាអំពី «ផែនការជ័យជំនះ» របស់ទីក្រុងគីវ ដើម្បីកម្ចាត់រុស្ស៊ី។

លោក Macron បានបញ្ជាក់ថា លោកបានអះអាងជាថ្មីពីការគាំទ្ររបស់ប្រទេសបារាំង «សម្រាប់ការទប់ទល់របស់អ៊ុយក្រែនប្រឆាំងការវាយលុករបស់រុស្ស៊ី»។