សហរដ្ឋអាមេរិក និងប្រទេសបារាំង បាននិយាយកាលពីថ្ងៃព្រហស្បតិ៍ថា ការពង្រឹងកងទ័ពរបស់ប្រទេសលីបង់ នឹងមានសារៈសំខាន់ខ្លាំងក្នុងការអនុវត្តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលមានគោលបំណងរក្សាសន្តិភាពនៅតាមព្រំដែនរបស់ប្រទេសនេះ ជាមួយអ៊ីស្រាអែល ។

ឯកអគ្គរដ្ឋទូតរងសហរដ្ឋអាមេរិក លោក Robert Wood បាននិយាយទៅកាន់កិច្ចប្រជុំរបស់ក្រុមប្រឹក្សាសន្តិសុខដែលមានសមាជិក១៥រូបថា សហគមន៍អន្តរជាតិត្រូវតែផ្តោតការខិតខំប្រឹងប្រែងរបស់ខ្លួន លើការពង្រឹងស្ថាប័នរដ្ឋរបស់ប្រទេសលីបង់។

លោកបាននិយាយថា «សេចក្តីសម្រេចចំពោះវិបត្តិនេះ ពុំមែនប្រទេសលីបង់កាន់តែទន់ខ្សោយនោះទេ វាជាប្រទេសលីបង់ដ៏រឹងមាំ និងអធិបតេយ្យភាពពិតប្រាកដ ត្រូវបានការពារដោយកម្លាំងសន្តិសុខស្របច្បាប់ ដែលមាននៅក្នុងកងកម្លាំងប្រដាប់អាវុធរបស់ប្រទេសលីបង់។

បេសកកម្មរក្សាសន្តិភាពរបស់អង្គការសហប្រជាជាតិ ត្រូវបានកំណត់អាណត្តិដោយសេចក្តីសម្រេចលេខ១៧០១ អនុម័តកាលពីឆ្នាំ២០០៦ ដើម្បីជួយដល់កងទ័ពលីបង់ រក្សាតំបន់ព្រំដែនភាគខាងត្បូងរបស់ខ្លួនជាមួយអ៊ីស្រាអែលដោយគ្មានអាវុធ ឬបុគ្គលិកប្រដាប់អាវុធក្រៅពីរដ្ឋលីបង់។

កាលពីមួយឆ្នាំមុន ក្រុមហេសបូឡា បានចាប់ផ្តើមបាញ់ផ្លោងទៅលើអ៊ីស្រាអែល ដើម្បីជួយដល់ក្រុមសកម្មប្រយុទ្ធហាម៉ាសប៉ាឡេស្ទីន នៅពេលចាប់ផ្តើមសង្រ្គាមនៅតំបន់ហ្កាហ្សា។ ជម្លោះ បានរីកធំឡើងក្នុងប៉ុន្មានសប្តាហ៍ថ្មីៗនេះ ខណៈអ៊ីស្រាអែល បានវាយប្រហារតាមអាកាស និងបានបើកការវាយលុក នៅភាគខាងត្បូងប្រទេសលីបង់។

ឯកអគ្គរដ្ឋទូតបារាំងប្រចាំអង្គការសហប្រជាជាតិ លោក Nicolas de Riviere បាននិយាយថា បទឈប់បាញ់បន្ទាន់មួយគឺត្រូវការជាចាំបាច់ ហើយសំណើសម្រាប់បទឈប់បាញ់រយៈពេល២១ ថ្ងៃ ដែលបានដាក់ចេញដោយប្រទេសបារាំង និងសហរដ្ឋអាមេរិក កាលពីខែមុន នៅតែរក្សាទុក។ លោក Wood បាននិយាយថា សហរដ្ឋអាមេរិក កំពុងធ្វើការឆ្ពោះទៅរកដំណោះស្រាយផ្នែកការទូត ប៉ុន្តែពុំបាននិយាយអំពីបទឈប់បាញ់នោះទេ។