នៅក្នុងកិច្ចប្រជុំកំពូលអាស៊ាន-អូស្ត្រាលី លើកទី៤ នៅទីក្រុងវៀងចន្ទន៍ សាធារណរដ្ឋប្រជា​ធិបតេយ្យ​ប្រជាមានិតឡាវ កាលពីរសៀលថ្ងៃទី១០ ខែតុលា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបញ្ជាក់​ពី​ការ​ប្តេជ្ញា​ចិ​ត្ត​របស់​កម្ពុជា​ក្នុង​ការ​ធ្វើ​ការ​ជាមួយ​អូស្ត្រាលដើម្បីធ្វើឱ្យសមាហរណកម្មសេដ្ឋកិច្ចតំបន់ឱ្យកាន់តែស៊ីជម្រៅថែមទៀត។

សម្តេចធិបតី បានបញ្ជាក់នូវការប្តេជ្ញាចិត្ត ក្នុងការធ្វើការជាមួយអូស្ត្រាលី ដើម្បីធ្វើឱ្យ​សមាហរណកម្ម​សេដ្ឋកិច្ចតំបន់ឱ្យកាន់តែស៊ីជម្រៅថែមទៀត ហើយនៅក្នុងន័យនេះ កម្ពុជាបាន​ស្វាគមន៍​ការ​ដាក់ឱ្យអនុវត្តនូវឯកសារយុទ្ធសាស្ត្រ សេដ្ឋកិច្ចអាស៊ីអាគ្នេយ៍របស់ អូស្ត្រាលីឆ្ពោះ​ទៅ​ឆ្នាំ២០៤០ (Invested: Australia's Southeast Asia Economic Strategy to 2040) ដើម្បី​ពង្រឹង​ទំនាក់ទំនងសេដ្ឋកិច្ចទ្វេភាគី។

សម្ដេចធិបតីបានគូសបញ្ជាក់ថា ដើម្បីចាប់យកអត្ថប្រយោជន៍​ឱ្យ​បាន​ជា​អតិបរមា​ពី​ការ​ដំឡើង​កម្រិត​កិច្ច​ព្រមព្រៀងពាណិជ្ជកម្មសេរី អាស៊ាន-អូស្ត្រាលី-នូវែលហ្សេឡង់ (AANZFTA) នាពេល​ថ្មី​ៗ​នេះ អាស៊ាន និងអូស្ត្រាលីត្រូវបង្កើនល្បឿនក្នុងដំណើរការផ្តល់សច្ចាប័ន ដើម្បីធ្វើយ៉ាង​ណា​ធានា​ឱ្យ​ពិធីសារទី២ ស្តីពីវិសោធនកម្មលើ កិច្ចព្រមព្រៀង AANZFTA ចូលជាធរមាន​តាម​ពេល​កំណត់​។

សម្តេចធិបតីក៏បានសង្កត់ធ្ងន់ពីសារសំខាន់ក្នុងការលើកកម្ពស់កិច្ចសហប្រតិបត្តិការក្នុងឧស្សាហកម្ម​ដែលកំពុងលេចឡើងថ្មីៗ មានជា អាទិ៍ ក្នុងវិស័យសេដ្ឋកិច្ចឌីជីថល របៀបវារៈបៃតង និង​បណ្តាញ​អគ្គិសនី អាស៊ាន ខណៈគូសបញ្ជាក់អំពីទំនាក់ទំនងរវាងប្រជាជន និងប្រជាជនដ៏រឹងមាំ ដែល​បានដើរតួនាទីជាមូលដ្ឋានគ្រឹះដ៏រឹងមាំ សម្រាប់ភាពជាដៃគូអាស៊ាន-អូស្ត្រាលី។

សម្តេចធិបតី ក៏បានលើកទឹកចិត្តឱ្យអូស្ត្រាលីជួយផ្តល់ការគាំទ្រដល់សហគ្រាសអាស៊ានតូចៗ ដើម្បីឱ្យ​កាន់តែមានផលិតភាព មានសមត្ថភាពប្រកួតប្រជែង និងមានភាពធន់ រួមទាំង​តាម​រយៈ​ការចាប់យកឧបករណ៍ឌីជីថលនានា និងការទទួលបានថែមទៀតនូវច្រកចូលទីផ្សារ និង​ហិរញ្ញប្បទាន​៕