ក្រសួងអប់រំ យុវជន និងកីឡា បានរៀបចំមណ្ឌលកំណែចំនួន១០ទីតាំង សម្រាប់​កែលើ​សន្លឹក​កិច្ចការ​ទាំង​១០មុខវិជ្ជា នៃការប្រឡងបាក់ឌុប ទាំងថ្នាក់វិទ្យាសាស្ត្រ និងថ្នាក់សង្គម ខណៈ​គិត​ត្រឹម​ថ្ងៃនេះ ក្រុមការងារក្រសួងអប់រំ ដោយមានការ​ចូលរួម​គ្រប់​ដំណាក់​កាល​ពី​មន្ត្រី​អង្គភាព​ប្រឆាំង​អំពើ​ពុករលួយ កំពុងធ្វើការបែងចែកសន្លឹកកិច្ចការទៅមណ្ឌលកំណែនីមួយៗ។​

ក្រុមការងារជំនាញក្រសួងអប់រំ យុវជន និងកីឡា កំពុងបំពេញការងារយ៉ាងសកម្ម ដោយ​អនុវត្ត​តាម​នីតិវិធី កំណត់យ៉ាងច្បាស់លាស់ ជាជំហានៗ សម្រាប់ការប្រឡងបាក់ឌុប។ គ្រប់ដំណាក់កាល តែងមានវត្តមានមន្ត្រីអង្គភាពប្រឆាំងអំពើពុករលួយ ចូលរួមត្រួត​ពិនិត្យ​ផង​ដែរ​។ ឈាន​ចូលមកដល់ថ្ងៃទី ១១ ខែតុលា ឆ្នាំ ២០២៤នេះ ក្រុមការងារក្រសួងអប់រំ កំពុង​ធ្វើ​ការ​បែង​ចែក និងដឹកជញ្ជូនសន្លឹកកិច្ចការទាំង ១០មុខវិជ្ជាទៅ កាន់មណ្ឌលកំណែទាំង ១០។ សម្រាប់​មណ្ឌលកំណែ ក្រសួងអប់រំ បានកំណត់យកទីតាំងវិទ្យាល័យបាក់ទូក វិទ្យាល័យ​ព្រះស៊ី​សុវត្ថិ វិទ្យាល័យហ៊ុនសែន ប៊ុនរ៉ានី វត្តភ្នំ វិទ្យាល័យជាស៊ីមសន្ធរម៉ុក អនុវិទ្យាល័យចតុមុខ វិទ្យាល័យ​ជាស៊ីមបឹងកេងកង វិទ្យាល័យបឹងត្របែក បឋមសិក្សាសន្ធរម៉ុក វិទ្យាល័យព្រះយុគន្ធរ និងវិទ្យាល័យទួលទំពូង។

ឯកឧត្តម លាង សេងហាក់ គណៈមេប្រយោគទូទាំងប្រទេសកំណែ លើកឡើងថាការងារបន្ទាប់ ក្រោយ​បែងចែកសន្លឹកកិច្ចការទៅដល់មណ្ឌលកំណែ គឺក្រុមការងារនឹងចាប់ផ្ដើមរាប់ ពិនិត្យដុំ​សន្លឹក​កិច្ចការ ទើបឈានទៅការកាត់ក្បាល ចុះអក្សរសម្ងាត់ជាដើម។ ឯកឧត្តមបន្តថា អត្រា​កំណែ​នឹង​ចាប់ផ្ដើមធ្វើនៅព្រឹកថ្ងៃទី១៣ ខែតុលា ដែលអាត្រាកំណែទាំងនោះ ត្រូវឆ្លង​កាត់​ការ​ទទួល​ស្គាល់ ឯកភាពដោយ ឯកឧត្តមរដ្ឋមន្ត្រី ក្រសួងអប់រំ។

សម្រាប់ការកែសន្លឹកកិច្ចការបេក្ខជនប្រឡងបាក់ឌុបទាំងជិត ១៤ម៉ឺននាក់នេះ មានគ្រូប​ង្រៀន​ថ្នាក់​ទី១២ ប្រមាណ ៧ ០០០នាក់។ តាមការគ្រោង​ទុក​លទ្ធផល​ប្រឡង​នឹង​ត្រូវ​ប្រកាស​នៅ​តាម​មណ្ឌល​ប្រឡង​ក្នុងរាជធានីភ្នំពេញ និងខេត្ត​កណ្ដាល នារសៀលថ្ងៃទី៣០ ខែតុលា ឆ្នាំ២០២៤ និង​នៅតា​មមណ្ឌលប្រឡងក្នុងខេត្តផ្សេងទៀត នាថ្ងៃទី៣១ ខែតុលា ឆ្នាំ២០២៤ និងផ្សព្វផ្សាយ​តាម​បណ្ដាញ​ទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា។

ការប្រឡងបាក់​ឌុបទាំងពីរថ្ងៃនេះ បេក្ខជនអវត្តមានសរុប មានចំនួន២.៤០៦នាក់ ក្នុងចំណោម​បេក្ខជន​សរុប ១៣៧.០៤០នាក់។ ចំនួនសិស្សអវត្តមាន គិតជាភាគរយ គឺស្មើនឹង ១,៧៦% នៃ​បេក្ខជន​សរុប។ ភាគច្រើននៃសិស្សដែលអវត្តមាន គឺ បេក្ខជនស្វៃរិន (ចំណេះទូទៅ និង​បំពេញ​វិជ្ជា​) ដែលមានចំនួនរហូតដល់ ១.៩៩០នាក់៕ អត្ថបទ៖ គឹមហុក