នាយកអង្គការសហប្រជាជាតិទទួលបន្ទុកយុទ្ធភណ្ឌមិនទាន់ផ្ទុះពីជម្លោះប្រដាប់អាវុធ បានបង្ហាញការព្រួយបារម្ភអំពីអនាគតតំបន់ហ្កាហ្សាស្ទ្រីប។ លោកស្រី និយាយថា ទីភ្នាក់ងារ មិនអាចកំណត់គ្រឿងផ្ទុះបែបនេះបានទេ ហើយវាអាចមានផលវិបាក យូរអង្វែង។

លោកស្រី Ilene Cohn មកពីអង្គភាពសកម្មភាពកម្ចាត់មីនរបស់អង្គការសហប្រជាជាតិ ឬ UNMAS បាននិយាយទៅកាន់សារព័ត៌មាន NHK ក្នុងទីក្រុងតូក្យូកាលពីថ្ងៃព្រហស្បតិ៍ ថា អង្គភាពសកម្មភាពកម្ចាត់មីនរបស់អង្គការសហប្រជាជាតិ បានបន្តសកម្មភាពរបស់ខ្លួននៅតំបន់ហ្កាហ្សា សូម្បីតែបន្ទាប់ពីការប្រយុទ្ធគ្នាបានផ្ទុះឡើងរវាងកងកម្លាំងអ៊ីស្រាអែល និងក្រុមឥស្លាមនិយមហាម៉ាស នៅក្នុងតំបន់ហ៊ុមព័ទ្ធកាលពីខែតុលា ឆ្នាំមុនក៏ដោយ។

ស្ថាប័នអង្គការសហប្រជាជាតិនិយាយថា ខ្លួនបានធ្វើការវាយតម្លៃពីគ្រោះថ្នាក់ដោយគ្រឿងផ្ទុះនៅជាង ១០០ទីតាំង និងបានផ្ញើសារជាអក្សរចំនួន១លានសារទៅកាន់អ្នករស់នៅក្នុងតំបន់ហ្កាហ្សា។

ស្ថាប័ននេះ និយាយថា ខ្លួនក៏បានបង្កើនការយល់ដឹងតាមរយៈការផ្សព្វផ្សាយតាមវិទ្យុ។ ប៉ុន្តែលោកស្រី Cohn បានប្រាប់ សារព័ត៌មាន NHK ថា «គួរឲ្យសោកស្តាយ វាពុំអាចទៅរួចនោះទេ ចាប់តាំងពីសង្រ្គាមបានចាប់ផ្តើម យុទ្ធភណ្ឌមិនទាន់ផ្ទុះ មានច្រើនខ្លាំងនៅទូទាំងតំបន់ហ្កាហ្សា។

លោកស្រីនិយាយថា ការព្រួយបារម្ភរបស់លោកស្រី គឺសុវត្ថិភាពរបស់ជនស៊ីវិល និងបុគ្គលិកមនុស្សធម៌ ដែលត្រូវ «ធ្វើដំណើរក្នុងបរិយាកាសដែលមានគ្រោះថ្នាក់ខ្លាំង»។ វាមិនច្បាស់នោះទេថាតើ គ្រាប់យុទ្ធភណ្ឌ ដែលបានកប់ក្នុងគំនរបាក់បែកមានចំនួនប៉ុន្មាន។

លោកស្រី Cohn ក៏បានចង្អុលបង្ហាញថា ដោយពុំមានបទឈប់បាញ់ត្រូវបានមើលឃើញ វាមានការគាំទ្រពីអន្តរជាតិមិនគ្រប់គ្រាន់ឡើយ។ ពេលនេះយើងកំពុងធ្វើការក្នុងកម្រិតមួយតូចតួចបំផុត ដើម្បីព្យាយាមការពារការរងរបួសធ្ងន់ធ្ងរ។