ឧត្តរមានជ័យ៖ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ នៅរសៀលថ្ងៃទី១០តុលា ម្សិលមិញនេះ បានដឹកនាំមន្ត្រីជំនាញពាក់ព័ន្ធ ចុះជួបសំណេះសំណាល​ជាមួយប្រជាពលរដ្ឋ នៅក្នុងសង្កាត់អូរស្មាច់ ក្រុងសំរោងខេត្តឧត្តរមានជ័យ ដែលកំពុងប្រឈមនិងការខ្វះខាត​ទឹកស្អាត​ប្រើប្រាស់មិនគ្រប់គ្រាន់ ដោយសារកត្តានៅតំបន់លើភ្នំ គ្មានប្រភពទឹកគ្រប់គ្រាន់ ។

ក្នុងឱកាសនោះ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានមានប្រសាសន៍ថា ដោយកត្ដាស្ថានភាពភូមិសាស្ត្រ និងកំម្រិតទឹកភ្លៀង ពុំមានភ្លៀងធ្លាក់គ្រប់គ្រាន់នោះ ធ្វើឲ្យ​ប្រជាពលរដ្ឋ​រស់នៅលើតំបន់ភ្នំអូរស្មាច់ តែងតែ​ជួបបញ្ហា​និងប្រឈមការខ្វះទឹកស្អាត​ប្រើប្រាស់ ដូច្នេះហើយ​អាជ្ញាធរខេត្ត​សូមអំពាវនាវឲ្យប្រជាពលរដ្ឋ រស់នៅសង្កាត់អូរស្មាច់ទាំងអស់ ដែលកំពុងខ្វះខាតទឹកស្អាតប្រើប្រាស់​ប្រចាំថ្ងៃ​ មិនគ្រប់គ្រាន់ ត្រូវចេះប្រើប្រាស់​និង​ទុកដាក់​ប្រភពទឹក ដោយការសន្សំ​សំចៃ​ និងត្រៀមនៅសម្ភារសម្រាប់ដាក់ទឹកដូចជា ពាង ធុង ពីដុង ទាំងអស់គ្នាផងដែរ ។

ក្នុងការចុះពិនិត្យស្ថានភាពទឹកនៅពេលនោះដែរ ឯកឧត្តមអភិបាលខេត្ត បានណែនាំ​ដល់នាំមន្ត្រី​ជំនាញ និងក្រុមហ៊ុនផ្គត់ផ្គង់ទឹកស្អាត ត្រូវបន្ត​ចុះទៅពិនិត្យទីតាំង​កន្លែង​រៀបចំ អាង​ស្តុក​ទឹក​មួយកន្លែងនៅភូមិអូរពក សង្កាត់កូនក្រៀល ក្រុងសំរោង ខេត្តឧត្តរមានជ័យ ​ដែលនិងអាចស្ដុក ទឹកបានប្រហែលជាង ៨សែនម៉ែត្រគូប ​អាចផ្គត់ផ្គង់ ទៅដល់បងប្អូន​ប្រជាពលរដ្ឋបានចំនួន ២សង្កាត់ គឺសង្កាត់អូរស្មាច់ និងសង្កាត់កូនក្រៀល ដើម្បីត្រៀម​ផ្គត់ផ្គង់​បានទាំងរដូវប្រាំង និងរដូវវស្សា កុំឲ្យមានការ​ខ្វះខាត​បន្តទៀតផងដែរ ។

ជាមួយគ្នានោះដែរ​ឯកឧត្តមអភិបាលខេត្ត បានជំរុញបន្ថែមដល់មន្ត្រី​ជំនាញ​មន្ទីរធនធានទឹក និង​ឧតុនិយមខេត្ត និងក្រុមហ៊ុនផ្គត់ផ្គង់​​ទឹកស្អាត ត្រូវសហការគ្នាពន្លឿនៅការ​បិទទំនប់ ​និង ក្រុមហ៊ុន​ដាក់​ទុយោទឹកអោយឆាប់រហ័ស ​ដើម្បីផ្តល់​ជូនប្រជាពលរដ្ឋ​ ឲ្យបានឆាប់នៅពេលខាងមុខនេះ៕