អ្នកនាំពាក្យកងកម្លាំង បាននិយាយកាលពីថ្ងៃព្រហស្បតិ៍ (១០ តុលា) ថា កងកម្លាំងរក្សាសន្តិភាពរបស់អង្គការសហប្រជាជាតិ បានប្តេជ្ញាចិត្តថានឹងបន្តឈរជើងនៅទីតាំងរបស់ពួកគេនៅភាគខាងត្បូងប្រទេសលីបង់ បើទោះបីជាការវាយប្រហាររបស់អ៊ីស្រាអែលក្នុងរយៈពេលប៉ុន្មានថ្ងៃថ្មីៗនេះក៏ដោយ ដែលបានធ្វើឱ្យបុគ្គលិកអង្គការសហប្រជាជាតិរងរបួស និងបានជំរុញឱ្យមានការភ្ញាក់ផ្អើលជាអន្តរជាតិ។

លោក អាន់ឌ្រា ធេនិនទី (Andrea Tenenti) បាននិយាយថា ការវាយប្រហាររបស់អ៊ីស្រាអែល លើកងកម្លាំងរក្សាសន្តិភាព ដែលគេស្គាល់ថា UNIFIL ជាមួយនឹងការបាញ់ផ្លោងរថក្រោះ និងការបាញ់អាវុធធុនតូច បានធ្វើឱ្យសមាជិកពីរនាក់រងរបួសនៅក្នុងមន្ទីរពេទ្យ និងបំផ្លាញសមត្ថភាពត្រួតពិនិត្យមួយចំនួនរបស់ពួកគេនៅថ្ងៃពុធ និងថ្ងៃព្រហស្បតិ៍។

លោក Tenenti បាននិយាយនៅក្នុងបទសម្ភាសមួយដោយសំដៅលើការបាញ់ប្រហាររវាងកងទ័ពអ៊ីស្រាអែល និងក្រុមប្រដាប់អាវុធលីបង់ ហេសបូឡា ថា “នេះប្រហែលជាព្រឹត្តិការណ៍ ឬឧបទ្ទវហេតុធ្ងន់ធ្ងរបំផុតមួយ ដែលយើងបានឃើញក្នុងរយៈពេល ១២ខែចុងក្រោយនេះ”។

ប្រទេសចូលរួមចំនួន៥០ របស់កងកម្លាំង បានព្រមព្រៀងគ្នាកាលពីថ្ងៃព្រហស្បតិ៍ ដើម្បីបន្តដាក់ពង្រាយកងកម្លាំងរក្សាសន្តិភាពជាង ១០.៤០០នាក់ រវាងទន្លេ លីតានី (Litani) នៅភាគខាងជើង និងព្រំដែនទទួលស្គាល់ដោយអង្គការសហប្រជាជាតិរវាងលីបង់ និងអ៊ីស្រាអែល ដែលគេស្គាល់ថាជាខ្សែបន្ទាត់ពណ៌ខៀវនៅភាគខាងត្បូង៕