ក្រសួងការបរទេសចិនបានច្រានចោលការចោទប្រកាន់ ដែលថា ខ្លួនមើលឃើញសហរដ្ឋអាមេរិកជាមហាអំណាចធ្លាក់ឥទ្ធិពល ដោយអះអាងថា ខ្លួនមិនបានមើលឃើញខ្លួនឯងស្ថិតនៅក្នុងការប្រកួតប្រជែងដោយផ្ទាល់ជាមួយសហរដ្ឋអាមេរិកនោះទេ ហើយបានបញ្ជាក់ថា នេះមិនមែនជាអ្វីដែលពិភពលោកចង់ឃើញឡើយ។

ក្នុងសន្និសីទសារព័ត៌មាន នៅទីក្រុងប៉េកាំង កាលពីថ្ងៃព្រហស្បតិ៍ (ទី១០ ខែតុលា) អ្នកនាំពាក្យក្រសួងការបរទេសចិន លោកស្រី Mao Ning (ម៉ៅ នីង) បាននិយាយថា ជម្លោះណាមួយ រវាងមហាអំណាចពិភពលោកទាំង២ និងការចោទប្រកាន់ដែលថា ចិនមើលឃើញសហរដ្ឋអាមេរិកកំពុងធ្លាក់ចុះឥទ្ធិពលនោះ គឺចេញមកពី «ការខ្វះទំនុកចិត្តផ្ទាល់ខ្លួន» ក្នុងចំណោមមន្ត្រីសហរដ្ឋអាមេរិក។

លោកស្រី Mao បានបន្តថា៖ «ឥឡូវនេះ ជាថ្មីម្តងទៀត យើងឮការកត់សម្គាល់ ដែលត្រូវបានប្រើប្រាស់យ៉ាងជោគជាំនៅក្នុងសម័យសង្រ្គាមត្រជាក់ និងនៅក្នុងក្រុមមនុស្សចង់គ្រប់គ្រងលោកមានចិត្តគំនិតយកចំណេញតែខ្លួនឯង និងតាមបែបអាមេរិក ដែលត្រូវបានបង្កើតឡើងយ៉ាងច្បាស់ ដើម្បីឃោសនារឿងមិនពិតផ្សេងទៀត អំពី «ការគំរាមកំហែងរបស់ចិន» និងការប្រកួតប្រជែង ក្នុងប្រទេសធំៗ ដើម្បីយកជាលេសទប់ស្កាត់ និងដាក់គំនាបលើប្រទេសចិន»។

លោកស្រី Ma បានសង្កត់ធ្ងន់ថា៖ «គោលដៅអភិវឌ្ឍន៍របស់ប្រទេសចិន គឺដើម្បីកែលម្អជីវភាពរស់នៅរបស់ប្រជាជនចិនជាង ១,៤ពាន់លាននាក់។ យើងមិនមានចេតនាយកឈ្នះអ្នកណាម្នាក់ ឬទៅជំនួស ឬប្រជែងជាមួយអ្នកណាម្នាក់នោះឡើយ។ ប្រទេសចិនរីករាយដែលបានឃើញការអភិវឌ្ឍ និងភាពរីកចម្រើន នៅសហរដ្ឋអាមេរិក។ ខ្ញុំបារម្ភថា វាជាការអស់ជំនឿចិត្ត ដែលបុគ្គលខ្លះ នៅអាមេរិក និយាយដដែលៗ ដែលថា ប្រទេសចិនគិតថា សហរដ្ឋអាមេរិកធ្លាក់ចុះឥទ្ធិពលនោះ។ ចិនមិនប្រជែងជាមួយអាមេរិកទេ ហើយយើងក៏សង្ឃឹមថា អាមេរិកនឹងមិនប្រជែងជាមួយចិនដូចគ្នាដែរ។ ប្រជាជនចិននឹងដឹងច្បាស់ពីការធ្វើឲ្យមានភាពរស់រវើកដ៏អស្ចារ្យរបស់ជាតិ»៕