ការស៊ើបអង្កេតរបស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី១០ ខែតុលា) បានឲ្យដឹងថា ខ្លួនបានរកឃើញថា អ៊ីស្រាអែលបានអនុវត្តគោលនយោបាយព្រមព្រៀងគ្នាមួយ ក្នុងការបំផ្លាញប្រព័ន្ធថែទាំសុខភាព នៅតំបន់ហ្កាហ្សា ក្នុងសង្គ្រាមហ្កាហ្សា ជាសកម្មភាពដែលទាក់ទងនឹងឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដោយសារការសម្លាប់រង្គាល។

សេចក្តីថ្លែងការណ៍របស់អតីតឧត្តមស្នងការ UN ទទួលបន្ទុកសិទ្ធិមនុស្ស លោកស្រី Navi Pillay ដែលត្រូវបានចេញផ្សាយនៅមុនមានរបាយការណ៍ពេញលេញ បានចោទប្រកាន់អ៊ីស្រាអែលថា បាន «វាយប្រហារដោយឥតឈប់ឈរ និងដោយចេតនាលើបុគ្គលិក និងទីតាំងពេទ្យ» នៅក្នុងសង្រ្គាម ដែលបង្កឡើងដោយការវាយប្រហារបង្ហូរឈាមឆ្លងព្រំដែនបស់ពួកសកម្មប្រយុទ្ធហាម៉ាស នៅភាគខាងត្បូងអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣។

នៅមុនការបង្ហាញរបាយការណ៍ទៅកាន់មហាសន្និបាតអង្គការសហប្រជាជាតិ នៅថ្ងៃទី៣០ ខែតុលា លោកស្រី Pillay បានប្រាប់ថា៖ «ជាពិសេស កុមារបានទទួលរងនូវការវាយប្រហារយ៉ាងធ្ងន់ធ្ងរ ទាំងដោយផ្ទាល់ និងដោយប្រយោល ដោយសារការដួលរលំនៃប្រព័ន្ធសុខាភិបាល»។

អ៊ីស្រាអែលនិយាយថា ក្រុមសកម្មប្រយុទ្ធ នៅតំបន់ហ្កាហ្សា ប្រតិបត្តិការពីតំបន់ដែលមានប្រជាជនរស់នៅច្រើន ក្នុងនោះរួមទាំងផ្ទះឯកជន សាលារៀន និងមន្ទីរពេទ្យ ហើយខ្លួននឹងវាយប្រហារគ្រប់ទីកន្លែងដែលពួកគេបានបង្ហាញខ្លួន ស្របពេលដែលព្យាយាមជៀសវាងបង្កគ្រោះថ្នាក់ដល់ជនស៊ីវិលផងដែរ។ តែក្រុមហាម៉ាស់បដិសេធការលាក់ខ្លួនពួកសកម្មប្រយុទ្ធ អាវុធ និងប៉ុស្តិ៍បញ្ជាការ ក្នុងចំណោមជនស៊ីវិល។

ជាមួយគ្នានេះ សេចក្តីថ្លែងការណ៍ស៊ើបអង្កេតរបស់ UN ក៏បានចោទប្រកាន់កងកម្លាំងអ៊ីស្រាអែលពីបទសម្លាប់ និងធ្វើទារុណកម្មបុគ្គលិកពេទ្យដោយចេតនា ដោយបានកំណត់គោលដៅលើរថយន្តពេទ្យ និងការរឹតបន្តឹងការអនុញ្ញាតឲ្យអ្នកជំងឺចាកចេញពីតំបន់ឡោមព័ទ្ធហ្កាហ្សាស្ទ្រីប៕