សហរដ្ឋអាមេរិក និងបារាំង និយាយកាលពីថ្ងៃព្រហស្បតិ៍ថា ការពង្រឹងកងទ័ពលីបង់ នឹងសំខាន់ចំពោះការអនុវត្តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ(UN) ដែលមានគោលដៅរក្សាសន្តិភាពនៅតាមព្រំដែនរបស់ប្រទេសមួយនេះ ជាមួយអ៊ីស្រាអែល ។

ឯកអគ្គរដ្ឋទូតរងសហរដ្ឋអាមេរិកប្រចាំនៅ UN លោក Robert Wood បាននិយាយប្រាប់ជំនួបក្រុមប្រឹក្សាសន្តិសុខមានសមាជិក ១៥ប្រទេសថា សហគមន៍អន្តរជាតិ ត្រូវតែផ្តោតសំខាន់លើកិច្ចខិតខំរបស់ខ្លួនលើការពង្រឹងស្ថាប័នរដ្ឋលីបង់ ។

លោកនិយាយថា សេចក្តីសម្រេចចំពោះវិបត្តិមួយនេះ មិនត្រូវធ្វើឲ្យប្រទេសលីបង់ចុះខ្សោយនោះទេ ។ វាត្រូវតែជាលីបង់មានអធិបតេយ្យភាពពិតប្រាកដ និងខ្លំាក្លា ការពារដោយកងកម្លាំងសន្តិសុខស្របច្បាប់ តំណាងដោយកងកម្លាំងប្រដាប់អាវុធលីបង់ ។

លោក Wood និយាយថា សហរដ្ឋអាមេរិក កំពុងធ្វើការឆ្ពោះទៅរកដំណោះស្រាយការទូត ប៉ុន្តែលោកពុំបានអះអាងពីបទឈប់បាញ់នោះទេ ។

ខណៈពេលនោះដែរ ឯកអគ្គរដ្ឋទូតបារាំងប្រចាំនៅ UNលោក Nicolas de Riviere និយាយថា បទឈប់បាញ់បន្ទាន់ ត្រូវការជាចាំបាច់ ហើយសំណើសម្រាប់បទឈប់បាញ់រយៈពេល ២១ថ្ងៃ ដាក់ជូនដោយបារាំង និងសហរដ្ឋអាមេរិក កាលពីខែមុន នៅតែមានដដែល ។

បេសកកម្មថែរក្សាសន្តិភាពរបស់ UN មានឈ្មោះ UNIFIL ដែលត្រូវបានកំណត់ដោយសេចក្តីសម្រេចលេខ ១៧០១ បានអនុម័តកាលពីឆ្នាំ ២០០៦ ដើម្បីជួយកងទ័ពលីបង់រក្សាតំបន់ព្រំដែនភាគខាងត្បូងរបស់ខ្លួនជាមួយអ៊ីស្រាអែល ឲ្យគ្មានអាវុធ ឬកងកម្លាំងប្រដាប់អាវុធ ជាជាងរដ្ឋលីបង់ ។ នោះហើយនាំឲ្យមានការរង្កៀសចិត្តជាមួយកងកម្លាំងប្រដាប់អាវុធធន់ធ្ងន់ហេសបូឡាគាំដោយអ៊ីរ៉ង់ ។

កាលពីរយៈពេល ១ឆ្នាំមុន ក្រុមហេសបូឡា បានផ្ទុះអាវុធជាមួយអ៊ីស្រាអែល ដើម្បីគាំទ្រក្រុមជីវពលប៉ាឡេស្ទីនហាម៉ាស់ នៅពេលចាប់ផ្តើមសង្រ្គាមហ្កាហ្សា ។

ជម្លោះមួយនេះ បានឡើងកម្តៅខ្លាំងក្នុងរយៈពេលប៉ុន្មានសប្តាហ៍ចុងក្រោយនេះ ពេលដែលអ៊ីស្រាអែល បើកការវាយប្រហារតាមច្រកអាកាស និងវាយប្រហារតាមជើងគោកលើតំបន់ភាគខាងត្បូងប្រទេសលីបង់ ៕