មន្ត្រីប្រចាំរដ្ឋ និងសហព័ន្ធរបស់សហរដ្ឋអាមេរិក ដែលកំពុងតែប្រឈមជាមួយព្យុះសង្ឃរាមួយហើយមួយទៀត ដែលបានសម្លាប់មនុស្សរាប់រយនាក់ នៅទូទាំងភាគអាគ្នេយ៍របស់ប្រទេស ពេលនេះកំពុងជួបនឹងការគំរាមកំហែងទាក់ទងនឹងគ្រោះមហន្តរាយមួយផ្សេងទៀត នោះគឺ ព័ត៌មានមិនពិត ជុំវិញកិច្ចខិតខំប្រឹងប្រែងសង្គ្រោះរបស់ពួកគេ និងមូលហេតុនៃព្យុះនេះ។

ទ្រឹស្តីឃុបឃិត និងពាក្យសម្ដីស្អប់ខ្ពើមដែលផ្តោតលើការឆ្លើយតបចំពោះព្យុះរបស់រដ្ឋាភិបាល បានផ្ទុះឡើងនៅទូទាំងបណ្ដាញសង្គម ជាពិសេសនៅលើបណ្ដាញសង្គម X បន្ទាប់ពីព្យុះសង្ឃរា Helene បានបំផ្លិចបំផ្លាញតំបន់ ដោយអតីតប្រធានាធិបតី Donald Trump និងម្ចាស់របស់បណ្ដាញសង្គម X លោក Elon Musk បំប៉ោងការចោទប្រកាន់ឲ្យកាន់តែរីកធំឡើងៗ ដោយមិនមានភស្តុតាងជាក់លាក់។

ឥឡូវនេះ បន្ទាប់ពីព្យុះសង្ឃរា Milton វាយប្រហាររដ្ឋ Florida កាលពីយប់ថ្ងៃទី៩ ខែតុលា មន្ត្រីអាមេរិកបានយកតំបន់រងគ្រោះនៅរដ្ឋនោះជាផ្នែកនៃយុទ្ធសាស្រ្តរបស់ពួកគេ ដើម្បីបដិសេធការលើកឡើងមិនពិតទាំងនោះ ខណៈក៏មានការស៊ើបអង្កេតផងដែរថា តើបុគ្គលបរទេសមានចូលរួមក្នុងការស្ដីបន្ទោសនេះដែរ ឬអត់។

ទ្រឹស្តីឃុបឃិតផ្សេងទៀតដែលបានចោទប្រកាន់ដោយគ្មានភស្តុតាងថា រដ្ឋាភិបាលនឹងឆ្លៀតយកឱកាសនេះ ដើម្បីរឹបអូសយកដីឯកជន ឬថា មន្ត្រីសហព័ន្ធបានបង្កើតឲ្យមានខ្យល់ព្យុះឡើងដោយបច្ចេករបស់ខ្លួន។

មន្ត្រីឆ្លើយតបគ្រាអាសន្ន និងអ្នកស្រាវជ្រាវពីភាពជ្រុលនិយម ព្រមានថា ចរាចរណ៍នៃការអះអាងបោកបញ្ឆោតបែបនេះ អំឡុងពេលមានគ្រោះមហន្តរាយ បង្កើតឲ្យមានគ្រោះថ្នាក់ ដែលអាចជំរុញមនុស្សឲ្យព្រងើយកន្តើយនឹងបញ្ជាជម្លៀស ឬបដិសេធការជួយសង្គ្រោះរបស់រដ្ឋាភិបាល៕