​ប្រដាល់​សកល៖ កីឡាករ​ប្រដាល់សកល​ជម្រើសជាតិ​កម្ពុជា​ប្រភេទ​ទម្ងន់ ៦៣,៥​គីឡូក្រាម ៤​រូបត្រូវបាន​សហព័ន្ធ​កីឡា​ប្រដាល់សកល​កម្ពុជាធ្វើការ​ផ្គូរ​ផ្គង់​ជា​គូ​ដណ្ដើម​ប្រាក់​លានក្នុង​កម្មវិធី Ultimate Boxing Championship 2021 (UBC-2021) នៅ​ថ្ងៃទី​១០ ខែតុលា​ចុង​សប្ដាហ៍​នេះនៅ​ក្លិប​ប្រដាល់​នាយកដ្ឋានអង្គរក្ស។​

​អ្នកលេង​កណ្ដាប់ដៃ​ទាំង ៤​រូបនេះរួមមាន​កីឡាករ សែត សា​រឹទ្ធ និង ទូច ដេវីត ដែលជា​ម្ចាស់​មេដាយប្រាក់​ជើងឯក​ថ្នាក់ជាតិឆ្នាំ​២០១៩។ កីឡាករ ម៉ាង ព្រហ្ម​ម៉ាញ ម្ចាស់​មេដាយមាស​ជើងឯក​ថ្នាក់ជាតិ​ឆ្នាំ​២០២០ និង​កីឡាករ វី សុ​ភ័ស ម្ចាស់​មេដាយ​សំរឹទ្ធ​ព្រឹត្តិការណ៍ China-ASEAN Boxing Championship 2019។ ​លោក ប៊ុ​យ សុ​ភ័​ណ្ឌ អគ្គលេខាធិការ​សហព័ន្ធបាន​ឲ្យ​ដឹងថា ជើង​ខ្លាំង​ប្រដាល់សកល​កម្ពុជា​ទាំង ៤​រូបនឹងត្រូវ​ធ្វើការ​ប្រកួត​សន្សំ​ពិន្ទុ​វិលជុំ បន្ទាប់មក​កីឡាករ​ឈរ​លេខ​១ និង​លេខ​២ នឹងត្រូវ​ប្រកួត​កាត់សេចក្ដី​រក​បេក្ខភាព​ប្រាក់​លាន ដោយ​អ្នកឈ្នះ​ទទួលបាន​ប្រាក់រង្វាន់ ៣​លាន​រៀល និង​អ្នកចាំទី​បាន ១​លាន​រៀល។​

​អគ្គលេខាធិការ​សហព័ន្ធ​ដដែល​បន្ដថា ការរៀបចំ​គូ​ដណ្ដើម​ប្រាក់​លាន​នេះ គឺ​សហព័ន្ធ​ចង់​ផ្ដល់ឱកាស​ដល់​ក្រុម​ជម្រើសជាតិបានធ្វើ​ការប្រកួត​កាន់តែច្រើនដើម្បី​បង្ហាញ ពង្រឹង និង​អភិវឌ្ឍ​សមត្ថភាព​ត្រៀម​ការប្រកួត​អន្ដរជាតិ​នានា ពិសេស​ត្រៀម​ការប្រកួត​កីឡា​ស៊ី​ហ្គេមឆ្នាំ​២០២២ នៅ​វៀតណាម​ផង និង​ស៊ី​ហ្គេមឆ្នាំ​២០២៣ នៅ​កម្ពុជា​ផង។​ ​សម្រាប់​ការប្រកួត​សប្ដាហ៍​ទី​៣ នៃ​ព្រឹត្តិការណ៍ UBC 2021 នេះដែរ ក្រៅពី​គូ​ដណ្ដើម​ប្រា​ក់លាន ក៏មាន​គូ​ឯក និង​គូ​ពិសេសៗ ៤​គូ​ផ្សេងទៀត​ផងដែរក្នុងនោះ​កីឡាករ ផល សុ​ភ័​ណ្ឌ ត្រូវ​ជួប​កីឡាករ រឿ​ម វណ្ណៈ កីឡាករ អំ ខេ​ម ជួប​កីឡាករ ថា រី​វ៉ា​, លី ហាង ជួប​កីឡាករ ឌឿ​ន ចំរុង និង​កីឡាករ សុផាត មេសា ជួប​កីឡាករ​ទម្ងន់​ស្រ​លា ណន សុខ​លីម៕

​អត្ថបទ៖ លី ឈុន​ឡា