បាល់ទាត់៖ ក្រុមអគ្គិសនីកម្ពុជាបានធានាកៅអីសុវត្ថិភាពពីការកាត់ចេញពីក្របខណ្ឌលីគកំពូលកម្ពុជាឆ្នាំ២០២២ ហើយ បន្ទាប់ពីប្រកួតស្មើក្រុមភ្ញៀវសូលទីឡូអង្គរ ២-២ កាលពីថ្ងៃពុធកន្លងទៅ ហើយការចែកគ្នា ១ពិន្ទុម្នាក់នេះបានធ្វើឲ្យក្រុមមានមូលដ្ឋាននៅខេត្តសៀមរាប សូលទីឡូអង្គរប្រឈមនឹងការរបូតឱកាសលេងលីគកំពូលកម្ពុជានារដូវកាលក្រោយកាន់តែខ្លាំង។
ជំនួបបង្គ្រប់សប្ដាហ៍ទី១៤ នៅកីឡដ្ឋានអគ្គិសនីកម្ពុជានេះ ក្រុមម្ចាស់ផ្ទះបានបើកការនាំមុខក្រុមភ្ញៀវ ១គ្រាប់មុនតាំងពី ៥៧វិនាទីដំបូងពីការស៊ុតរបស់កីឡាករ សាទី មុនក្រុមសូលទីឡូអង្គរវាយបកនាំមុខ ២-១ វិញដោយកីឡាករ Takeo Miyazaki នៅនាទី៣៦ និងកីឡាករ មិត្ត សាម៉ើយ នៅនាទី៦២។ ប៉ុន្ដែនៅនាទី៦៥ កីឡាករ សា ទី បានវាយបកគ្រាប់តាមស្មើ ២-២ ភ្លាមៗ ហើយលទ្ធផលនេះក៏បានរក្សាដល់ចប់ការប្រកួត។ តាមរយៈលទ្ធផលនេះបានធ្វើឲ្យក្រុមអគ្គិសនីកម្ពុជាបន្ដឈរលេខរៀងទី១១ មាន ១២ពិន្ទុ និងសល់ ១ប្រកួតក្នុងដៃ ខណៈក្រុមសូលទីឡូអង្គរបន្ដឈរបាតតារាងលេខរៀងទី១៣ មាន ៦ពិន្ទុ និងសល់ ២ប្រកួតទៀត។ តែបើគិតពិន្ទុបច្ចុប្បន្នទោះបីសូលទីឡូអង្គរឈ្នះ ២ប្រកួតចុងក្រោយ ក៏ក្រុមមានមូលដ្ឋាននៅខេត្តសៀមរាបនេះនៅតែចាញ់ប្រៀបអគ្គិសនីកម្ពុជាដដែល ព្រោះផ្អែកលើប្រវត្តិជួបគ្នាកាលពីជើងទី១ អគ្គិសនីកម្ពុជាបានយកឈ្នះសូលទីឡូអង្គរ ១-០។
ដូច្នេះបេក្ខភាពកំពុងប្រឈមនឹងការកាត់ចេញពេលនេះនៅសល់ ២ក្រុមប៉ុណ្ណោះរួមមានខេត្តព្រៃវែង និងសូលទីឡូអង្គរ។ បច្ចុប្បន្នព្រៃវែង កំពុងឈរលេខ១២ និងមាន ១០ពិន្ទុមានប្រៀបជាងសូលទីឡូអង្គរ ៤ពិន្ទុ ខណៈនៅសល់ ១ប្រកួតក្នុងដៃ។ ប្រសិនបើខេត្តព្រៃវែងឈ្នះការប្រកួតចុងក្រោយរបស់ខ្លួន បេក្ខភាពត្រូវកាត់ចេញនារដូវកាលក្រោយនឹងធ្លាក់ទៅក្រុមសូលទីឡូអង្គរ ដោយស្វ័យប្រវត្តិតែម្ដង។ តែបើព្រៃវែងចាញ់វិញ លុះត្រាសូលទីឡូអង្គរឈ្នះ ២ប្រកួតចុងក្រោយរបស់ខ្លួន ទើបពួកគេអាចគេចផុតពីការកាត់ចេញ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
