ក្រុមហេសបូឡា កំពុងត្រៀមខ្លួនសង្រ្គាមរយៈពេលយូរនៅតំបន់ភាគខាងត្បូងលីបង់ ក្រោយអ៊ីស្រាអែលសម្លាប់មេដឹកនាំកំពូលរបស់ពួកគេ ជាមួយនឹងបញ្ជាការយោធាថ្មីដឹកនាំការបាញ់គ្រាប់រ៉ុក្កែត និងសង្រ្គាមជើងគោកជាមួយអ៊ីស្រាអែល ។ នេះបើយោងតាមការឲ្យដឹងពីប្រភពចំនួន ២ដែលជិតស្និតនឹងប្រតិបត្តិការរបស់ពួកគេ ។

កម្លាំងរបស់ក្រុមហេសបូឡា បានថមថយ ដោយសារការវាយប្រហាររយៈពេល ៣សប្តាហ៍របស់អ៊ីស្រាអែល ពិសេសការសម្លាប់មេដឹកនាំរបស់ពួកគេគឺលោក Sayyed Hassan Nasrallah ។

បច្ចុប្បន្ន មិត្ត និងសត្រូវដូចគ្នា កំពុងរកវិធីទប់ទល់ឲ្យមានប្រសិទ្ធិភាពជាមួយទាហានអ៊ីស្រាអែល ដែលបានឆ្លងព្រំដែនចូលប្រទេសលីបង់ ធ្វើយ៉ាងណារុញច្រានពួកគេឲ្យចេញពីព្រំដែនទៅវិញ ។

ប្រភពចំនួន ៤ដែលជិតស្និតនឹងប្រតិបត្តិការរបស់ពួកគេ បានឲ្យដឹងថា ក្រុមប្រដាប់អាវុធធន់ធ្ងន់គាំទ្រដោយអ៊ីរ៉ង់មួយនេះ នៅមានស្តុកអាវុធដ៏ច្រើនសន្ធឹកសន្ធាប់ទៀត រួមទាំងមីស៊ីលតម្រង់គោលដៅដ៏មានឥទ្ធិពលបំផុតរបស់ពួកគេផងដែរ ដែលពុំទាន់បានប្រើនៅឡើយទេ បើទោះបីជាមានរលកនៃការវាយប្រហារតាមច្រកអាកាសដែលអ៊ីស្រាអែលនិយាយថា បានកម្ទេចកាំភ្លើងធំរបស់ពួកគេក៏ដោយ ។

បញ្ជាការក្រុមហេសបូឡា បានរងការអាក់ខានប៉ុន្មានថ្ងៃដំបូង ក្រោយការធ្វើឃាតរបស់លោក Nasrallah កាលពីថ្ងៃទី ២៧ ខែកញ្ញា រហូតដល់ក្រុមជីវពលស៊ីអ៊ីតមួយនេះ បង្កើតបន្ទប់ប្រតិបត្តិការថ្មី នៅរយៈពេល ៧២ម៉ោងក្រោយមក ៕