អ្នកនាំពាក្យរដ្ឋាភិបាលអាល្លឺម៉ង់ នៅថ្ងៃសុក្រ (ទី១១ ខែតុលា) នេះ បាននិយាយថា អធិការបតីអាល្លឺម៉ង់ លោក Olaf Scholz នឹងជួបជាមួយប្រធានាធិបតីទួរគី លោក Tayyip Erdogan នៅទីក្រុង Istanbul នាថ្ងៃទី១៩ ខែតុលា ជាកន្លែងដែលមេដឹកនាំទាំង២ នឹងពិភាក្សាអំពីសង្គ្រាម នៅអ៊ុយក្រែន និងស្ថានភាព នៅតំបន់មជ្ឈិមបូព៌ា។

ដោយមិនបានផ្តល់ព័ត៌មានលម្អិតបន្ថែមទៀត នៅឯសន្និសីទសារព័ត៌មានប្រចាំថ្ងៃរបស់រដ្ឋាភិបាល អ្នកនាំពាក្យរូបនេះ បានប្រាប់ថា បញ្ហាទេសន្តរប្រវេសន៍ ក៏ដូចជាបញ្ហាគោលនយោបាយទ្វេភាគី រួមជាមួយនឹងសេដ្ឋកិច្ច ក៏នឹងស្ថិតនៅក្នុងរបៀបវារៈនៃការពិភាក្សានេះផងដែរ។

អ្នកនាំពាក្យបាននិយាយបន្ថែមថា ប្រទេសទួរគី គឺជាដៃគូដ៏សំខាន់ សម្រាប់ប្រទេសអាល្លឺម៉ង់ ពាក់ព័ន្ធទៅនឹងប្រធានបទទេសន្តរប្រវេសន៍ និងសង្គ្រាម នៅអ៊ុយក្រែន។ អ្នកនាំពាក្យរូបនេះបានលើកឡើងថា៖ «រដ្ឋាភិបាលសហព័ន្ធ កំពុងពិភាក្សាបន្តជាមួយប្រទេសទួរគី ស្ដីពីបញ្ហាគោលនយោបាយទេសន្តរប្រវេសន៍ ក្នុងនោះរួមទាំងនៅក្នុងផ្នែកនៃកិច្ចសហប្រតិបត្តិការធ្វើមាតុភូមិនិវត្តន៍ផងដែរ»។

ចំណែកទីភ្នាក់ងារសារព័ត៌មានរដ្ឋ Anadolu របស់ទួរគី បានរាយការណ៍អំពីការធ្វើដំណើររបស់លោកប្រធានាធិបតី កាលព្រឹកថ្ងៃព្រហស្បតិ៍ (ទី១០ ខែតុលា) ដោយមិនបានផ្តល់ព័ត៌មានលម្អិត អំពីខ្លឹមសារនៃកិច្ចពិភាក្សានោះឡើយ៕