ប្រធានាធិបតីរុស្ស៊ីលោក Vladimir Putin មាននូវជំនួបជាមួយប្រធានាធិបតីអ៊ីរ៉ង់លោក Masoud Pezeshkian នាថ្ងៃសុក្រនេះ នៅប្រទេសតួកមេនីស្ថាន ជាទីដែលមេដឹកនាំទាំង ២ បានកោតសរសើរដល់ទំនាក់ទំនងសេដ្ឋកិច្ចកើនឡើងប្រទេសរបស់ពួកគេ និងមានទស្សនៈយល់ឃើញស្រដៀងគ្នាលើកិច្ចការពិភពលោក គឺជាការចងសម្ព័ន្ធមួយធ្វើឲ្យមានក្តីកង្វល់ដល់សហរដ្ឋអាមេរិក ។

ដោយមានការខ្វែងគំនិតគ្នាជាមួយទីក្រុងវ៉ាស៊ីងតោន និងសហភាពអឺរ៉ុប ជុំវិញសង្រ្គាមរុស្ស៊ីនៅអ៊ុយក្រែន លោក Putin ចង់ពង្រឹងទំនាក់ទំនងជាមួយអ្វីដែលលោកចាត់ទុកថាជាលោកខាងកើត និងលោកខាងត្បូង ។

លោក Putin ដែលប្រទេសរបស់លោកនឹងធ្វើជាម្ចាស់ផ្ទះកិច្ចប្រជុំកំពូលក្រុមប្រទេស BRICS នៅទីក្រុង Kazan នាថ្ងៃទី ២២-២៤ ខែតុលា ខាងមុខនេះ បានអញ្ជើញលោក Pezeshkian ឲ្យបំពេញទស្សនកិច្ចផ្លូវរដ្ឋមកកាន់ប្រទេសរុស្ស៊ី គឺជាសំណើមួយដែលមេដឹកនាំអ៊ីរ៉ង់រូបនេះ ព្រមទទួលយក ។

លោក Pezeshkian និយាយប្រាប់លោក Putin ថា វិស័យសេដ្ឋកិច្ច និងវប្បធម៌ ការទំនាក់ទំនងរបស់ពួកយើង ត្រូវបានពង្រឹងពី ១ថ្ងៃ ទៅ ១ថ្ងៃ ហើយនិងកាន់តែរឹងមាំជាងមុនថែមមួយកម្រិតទៀត ៕