​បាល់ទាត់៖ ក្រុមបាល់ទាត់​ជម្រើស​ជាតិ​កម្ពុជា​នឹង​ធ្វើ​ការប្រកួត​ជើង​ទី​១ នៃ​វគ្គ​ជម្រុះ​ពានរង្វាន់​បាល់​ទាត់​ជើងឯក​ទ្វីបអាស៊ី AFC Asian Cup China 2023 Qualifiers (Play-Off) ជាមួយ​ក្រុម​កោះ​ហ្គាំ​នា​រាត្រី​ថ្ងៃទី​០៩ ខែតុលា ឆ្នាំ​២០២១ ស្អែក​នេះ​នៅ​កីឡដ្ឋាន Khalifa Sport City ប្រទេស​បា​រ៉ែ​ន។​

​បេសកកម្ម​ប្រកួត​ផ្លូវការ​នេះនឹង​កើតឡើង បន្ទាប់ពី​ក្រុម​ជម្រើសជាតិ​កម្ពុជាប្រមូលផ្ដុំ​ហ្វឹកហាត់​បាន​រយៈពេល ៣​ថ្ងៃក្រោយ​ការធ្វើដំណើរ​ទៅដល់​បា​រ៉ែ​នកាលពី​ថ្ងៃទី​០៦ ខែតុលា​កន្លងទៅ។ អ្វីដែល​គួរ​ឲ្យ​កត់សម្គាល់គឺ​លោក Keisuke Honda អ្នកចាត់ការ​ទូទៅ​ក្រុម​គោព្រៃ​កម្ពុជាក៏បាន​ឆ្លៀតពេល​ដ៏​មមាញឹក​ជាមួយ​ក្លិប FK Suduva នៃ​លី​គ​កំពូល​ប្រទេស​លី​ទុយ​អា​នីធ្វើដំណើរ​ទៅ​ដឹកនាំ​ក្រុម​ផ្ទាល់​ផងដែរ។​ ​ក្រុម​ជម្រើសជាតិ​កម្ពុជានឹងត្រូវ​ជួប​កោះ​ហ្គាំចំនួន ២​ជើងនៅ​ទឹកដី​កណ្ដាល​នា​កីឡដ្ឋាន Khalifa Sport City តែមួយគត់ដើម្បី​ស្វែងរក​ក្រុម​ឈ្នះ​ឡើងទៅ​វគ្គ​ចែក​ពូ​ល​ជុំ​ទី​៣ នៃ​ពានរង្វាន់​ជើងឯក​ទ្វីបអាស៊ី​នេះ ដោយ​ជើង​ទី​១ ត្រូវ​ជួបគ្នា​នា​វេលា​ម៉ោង ១២៖៣០​នាទី​រំលង​អា​ធ្រា​តុ ឈានចូល​ថ្ងៃទី​១០ ខែតុលា (​ម៉ោង​នៅ​កម្ពុជា​) និង​ជើង​ទី​២ ជួបគ្នា​នា​វេលា​ម៉ោង​ ១១​យប់ថ្ងៃទី​១២ ខែតុលា (​ម៉ោង​នៅ​កម្ពុជា​)។

​មុន​ឈានដល់​ការប្រកួត​ដណ្ដើម​កៅអី​វគ្គ​ចែក​ពូ​ល AFC Asian Cup China 2023 Qualifiers នា​ចុង​សប្ដាហ៍​នេះ ក្រុម​ទាំងពីរមាន​ប្រវត្តិ​ធ្លាប់​ជួបគ្នា​ចំនួន ២​លើក​រួចមកហើយដោយ​លើក​ទី​១ ជួបគ្នា​ក្នុង​ពានរង្វាន់ AFC Challenge Cup កាលពី​ឆ្នាំ​២០០៦ កម្ពុជា​បាន​យកឈ្នះ​កោះ​ហ្គាំ ដោយ​លទ្ធផល ៣-០ និង​លើក​ទី​២ ជួបគ្នា​លក្ខណៈ​មិត្តភាព​អន្ដរជាតិនៅ​ពហុ​កីឡដ្ឋាន​ជាតិកាលពី​ឆ្នាំ​២០១៣ កម្ពុជាបាន​ចាញ់​កោះ​ហ្គា​វិញ ២-០។ ​សូមបញ្ជាក់ថា ក្រោយ​បញ្ចប់​ការប្រកួត​ជាមួយ​កោះ​ហ្គាំ ក្រុម​គោព្រៃ​កម្ពុជានៅ​មិនទាន់​បញ្ចប់​បេសកកម្ម​របស់ខ្លួន​នោះទេ ដោយ​កីឡាករ​អាយុ​លើស ២៣​ឆ្នាំត្រូវ​ត្រឡប់មក​មាតុភូមិ​មុន តែ​កីឡាករ​អាយុ​ក្រោម ២៣​ឆ្នាំត្រូវ​បន្ដដំណើរ​ទៅ​ជប៉ុនដើម្បី​ធ្វើការ​ប្រកួត​ជម្រុះ​ពានរង្វាន់ AFC U23 Asian Cup Uzbekistan 2022 – Qualifiers ពូ​ល K ដោយ​ក្រុម U23 កម្ពុជាត្រូវ​ជួប​ហុងកុងនា​ថ្ងៃទី​២៣-​តុលា និង​ជួប​ម្ចាស់ផ្ទះ​ជប៉ុននា​ថ្ងៃទី​២៦-​តុលា៕

​អត្ថបទ៖ លី ឈុន​ឡា